Kaul Sarawak-US majak tegut

0

BISI PELUANG: Jones (empat kanan) begambar enggau pemberita ari Utusan Borneo, The Borneo Post enggau See Hua ke nyadi surat berita rasmi ngatur program randau enggau Ambassador Amerika Syarikat.

KUCHING: Penatai Ambassador Amerika Syarikat (US) ngagai Malaysia Datuk Paul W. Jones, Hari Tiga tu tadi, dalam atur pengawa iya meri basa ngagai raban Peace Corp (semua raban tu ari menua Amerika) nyambut ke-50 taun Peace Corps udah ditumbuhka di Malaysia nengah kerejasama enggau Pustaka Negeri Sarawak.

Kelimpah ari nya mega, Peace Corp bisi mantaika pengawa pemandang raban ke udah kala gawa di menua Sarawak.

Raban Peace Corp kelia keterubah iya datai di Malaysia Timur kena 23 Ogos 1962, ngajar nembiak kelebih agi di menua pesisir jaku English, meri penemu bekaul enggau pengerai, pengawa betanam betupi sereta pengawa ke ngangkatka pengelantang pendiau mensia mayuh maya nya.

Ari pemayuh raban Peace Corp ke kala gawa di menua tu, sekeda bisi beruang bilik lalu diau mendam ditu nyentuk ke sehari tu. Atur pengawa Hari Tiga tu tadi dipenjadika Menteri Muda Dagang Temuai ti mega nyadi Chairman Gerempung Pemansang Ekonomi Menua Sarawak (SEDC) Datuk Talib Zulpilip, di palan ke sama, Pustaka Negeri Sarawak. Surat berita Utusan Borneo, The Borneo Post enggau See Hua nyadi surat berita rasmi ke nulis cherita bekaul enggau raban Peace Corp, lalu sekeda pemberita ari ketetiga surat berita bepeluang ngatur sesyen randau Tanya enggau Saut (T&S) begulai enggau Paul W. Jones.

UB Berita Iban: Bakani ku asai ati nuan maya datai di menua Sarawak?

Jones: Aku seruran berasai temegah ati meda pemanah menua kita. Tu ukai keterubah aku kitu (kepenudi endar dalam 2004). Pemadu manah laban bisi peluang betemu enggau bala bakih ari Sarawak lalu begulai serumpu makai enggau sida kelebih agi ari gerempung ke bekaul enggau US, baka WWF, Nature Society enggau Palan Biodiversity Sarawak (SBC).

Hari keterubah aku datai, aku bisi atur pengawa di Palan Pemadah Islam (IIC) ke dipeda aku chukup manah, nyauka sebaka enggau di menua kami. Tang semina juluk ati palan tu lain mimit, laban ke beempu bemacham pupu bansa sereta pengarap, lalu semua orang tau ngena palan tu enda ngira bansa tauka pengarap kita, ukai semina Islam aja.

Aku mega bisi dipadah, seraban (Pakar Islam) ari US bisi mega ngagai palan tu bedau lama tu ke udah. Aku baru udah merarau Gerempung Nyaga Ramp Menua (WWF), WCS, Gerempung Rampa Menua, orang ke suah begulai enggau kami ditu enggau di KL, Dr Rita, Sarawak mayuh bendar pekara bekaul jelu siga nya balat ngerinduka ati aku.

UB Berita Iban: Bakani ku gaya dipeda nuan peluang Sarawak bekerejasama enggau US?

Jones: Kerejasama entara Sarawak-US pelaba aku udah bisi kaul ke rapit kelebih agi dalam kompeni minyak enggau ges, ngaga silikon wafers, nanam puku di menua tu, dagang kelimpah ari bekunsi sejarah dalam mensia mayuh ke bisi kaul dalam Perang Dunya Kedua (WWII) kelia enggau raban Peace Corp ke mayuh udah mantu mensia mayuh menua tu. Kelimpah ari nya mega, kaul entara menua mega mungkur gerempung ke bisi bekait enggau rampa menua sereta jelu siga.

Keterubah iya mega, minggu baru tu ila, US nengah Peace Corp deka nganjung pakar dalam jaku English ngajar nembiak sekula ditu, pengajar nyengkaum bala tuai nembiak baka ke diadu kami di Pahang, Johor enggau Terengganu.

UB Berita Iban: Bakani ku US ulih mantu Sarawak dalam SCORE?

Jones: Baka sektor ukai perintah kami, kompeni sigi ngati kediri lebuh sida iya deka nanam puku ditu lalu ukai nengah Perintah kami, kebuah aku enda entu nemu naka ni penyampau ke bisi. Tang ke besai dagang US di menua Malaysia, baka Murphy Oil, NEC. Tang enti deka beratika di serata menua Malaysia, kaul US enggau Malaysia mayuh mungkur ngaga barang elektronik, minyak enggau ges. Di Malaysia, US nyadi kaul dagang lumur empat lalu ba US, Malaysia nyadi kaul dagang lumur 22 entara kaul dagang bukai dalam dunya. Lalu ngarapka kaul dagang terus nambah. Kelimpah ari nya mega, enti silik agi, entara US-Malaysia, sigi mayuh puku dagang, kaul entara menua, pengelikun enggau politik.

UB Berita Iban: Bakani ku gaya minta Visa masuk ngagai US diatu, udah New York kena serang dalam insiden 911, laban didinga, mar minta visa ari Malaysia kelebih agi  rayat ke bepengarap Islam, ni pengamat pengemar minta visa enti sema deka nemuai ngagai US?

Jones: Peminta visa ari peranak Malaysia masuk ngagai US, urung 95 persin dikemendarka laban Malaysia nadai sejarah ngaga pengawa salah, diau tauka gawa enda ngena peremit di US. Nadai penanggul, laban nyauka semua dikemendarka. Penyampau peminta visa majak nambah diatu, lalu ukai baka ke didinga kita. Enti sema ba pemakai pen nyamai digiga di US, laban mayuh pemakai ‘halal’ ungkup orang Islam.

UB Berita Iban: US seruran nyadi menua alai nembiak Malaysia belajar, tang taja pia, penyampau nyau kurang. Nama kebuah?

Jones: Enti nitih, penyampau nya nambah. Urung taun 1980, Perintah Malaysia mayuh nganjung nembiak belajar ngagai US. Tang udah Malaysia mayuh ngaga palan sistem pelajar enggau universiti ari menua luar, nembiak pen enda entu mayuh dianjung ngagai US. Tang enti diperatika, entara pemayuh menua, orang Malaysia mayuh dianjung belajar ngagai UK enggau US. UK enggau Australia tebilang agi laban enda jauh ari menua tu (baka Australia) lalu UK, sigi rayat menua tu teleba enggau menua nya. Tambah mega, diatu ungkus belajar sereta diau di Australia udah niki lalu di UK, bayar udah nambah, nya kebuah diatu mayuh nembiak Malaysia dianjung belajar ngagai US.

UB Berita Iban: US diatu dipilih dunya ketiga entara menua alai ngiga pemisi sereta menua endur dilindung ari penanggul politik menua bukai (asylum).

Jones: Sigi amat baka nya laban US tu beempu polisi ke tebuka kelebih agi ngagai rayat ari menua bukai ke ngerarika diri ngagai menua bukai. Enti nitih, mayuh endar mensia udah ditulung kami diau di US baka ari Myanmar. Enti diperatika kar menua Amerika, bisi 50 buah pelilih menua, lalu ulih diperatika mega, orang Islam ari Bosnia, Somalia, enggau menua Islam bukai ke diau di US, diasuh diau di serata menua. US seruran nyadi menua ke nerima orang ari menua bukai. Dalam kandang 5-10 taun tu ila, US deka nyadi menua mayuh orang biak ari China, nitihka pukul rata umur laban Eropah, Jepun, Korea enggau China, mensia ke diau di menua nya majak mayu agi orang tuai nyengkaum polisi menua ke terit iya nya enda tak sebarang nerima orang ari menua bukai.

UB Berita Iban: Enda ngachau ekonomi menua US enti iya baka nya?

Jones: Nya ngasuh kami mansang agi. Laban nadai kebuah orang ari menua bukai deka diau di US ngapa enti orang nya enda gawa bebendar ke ulih nyukung ekonomi US. Orang baka tu ke ngangkatka ekonomi menua kami.

UB Berita Iban: Baka pengawa dagang temuai, enda mayuh peranak Amerika nemuai ngagai Malaysia laban menua kita (US) besai, pia mega kita empu bejalaika pengawa dagang temuai enggau besai agi.

Jones: Enti dalam penyampau, urung 10,000 iku rayat Amerika diau tauka gawa di Malaysia. Ari penyampau nya, nyangka 4,000 iku nya udah ngelawa serata menua tu. Taja pen pia, penyampau nya enda mayuh enti dibanding enggau menua bukai, tang rayat Amerika entara peranak menua luar ke bisi peluang masuk program ‘Malaysia My 2nd Home’. Sekeda nya udah meli rumah di Melaka tauka Kuala Lumpur. Menua US sigi besai, lalu dagang temuai kami entara ke pengabis besai tang pekara ke ngait ati rayat Amerika tu lebih agi ba rampa menua, jelu babas, adat enggau kampung.

UB Berita Iban: Baka pemesai tauka tuai menua kita, Sekretari Clinton enggau Gates kala nemuai ngagai Malaysia. Pelaba nuan, agi bisi pemesai Amerika bukai deka datai tauka nemuai kitu?

Jones: Clinton gaga endar ati udah iya ke kitu, laban meda basa, adat sereta penyerakup rayat menua tu chukup manah enda ngira bansa tauka pengarap. Iya kala madah ngagai aku, iya deka kitu baru laban rindu ke menua kita. Baka nya mega enggau Gates sereta pemesai bukai.

UB Berita Iban: Bakani ku diperati kita meda Malaysia nyadi menua Islam ke liberal endar, bakani ku penemu kita Malaysia ulih mantu menua Islam bukai?

Jones: Malaysia menua ke udah mansang dalam ekonomi sereta mayuh udah berubah ke ulih ngimbang bemacham adat enggau agama, nya ke nyadi pemerat. Malaysia mayuh nyukung menua bukai laban ba penemu kami, penuduk kita ke sema enggau menua China, India enggau sekeda menua bukai. Bechuntoka bantu kita di menua Afghanistan (ti mega menua Islam), dalam pengerai, bekal ai enggau pengintu pengelantang indu menua nya. Muntang agi Malaysia mantu ari US.

UB Berita Iban: Bakani ku pemayuh tubuh US enggau ekonomi menua China ke majak nambah diatu?

Jones: US enggau China sama-sama bisi pemerat dalam dagang enggau ekonomi ke ulih dikerembaika ngagai serata dunya. Utai ke manah ba China, manah ba kami lalu utai ke manah ba US manah ba China laban sama mai penguntung tegal kaul dagang ke terit, sistem ekonomi ke tebuka, atur undang-undang dagang ke enda bebelit enggau pengelikun menua.

TU RETI IYA DALAM JAKU IBAN: Editor The Borneo Post, Margaret Apau (tengah) nerangka reti berita Peace Corp dalam jaku Iban (Utusan Borneo, lambar Iban) ngagai Jones (kiba).