PADAWAN: Sapit Menteri Dagang Temuai Malaysia Dato Dr James Dawos Mamit kemari bejadika Projek Ngangkatka Perengkaguna Dagang Temuai Telaga Ai Angat (Hot Spring)Panchor Dayak.
Projek ke beungkus RM450,000 berengkah digaga kenaka 1 Disember 2011 lalu tembu 3 Mei 2012 tu tadi.
Projek tu sebengkah ari 52 projek pemansang dagang temuai ke udah diungkupka ngagai nengeri Sarawak ke beungkus RM38.5 juta ti dikemendar perintah nengah Langgur Pemansang Lumpar Malaysia ke-10 (RMK-10).
“RM38.5 juta udah diungkupka ngagai nengeri Sarawak ba taun 2012 dikena ngangkatka Perengkaguna palan dagang temuai.
“Penyampau tu jauh besai ari taun 2011 enggau 2010 ngambika tau matak mayuh agi temuai ari dalam enggau luar menua datai,” ku iya.
Dawos ke mega Kaban Parlimen Mambong madah, projek ke udah tembu digaga tu tau meransang pengerembai industri dagang temuai nengeri Sarawak kelimpah ke nyendia awak kereja sereta tau ngangkatka ekonomi ruang bilik rayat ke diau ngelingi.
“Projek tu diserah ngagai Komiti Pemansang enggau Pengelikun Kampung(JKK)Panchor Dayak sereta Opis Kunsil Pelilih Serian ngambika tau meri servis ke pemadu manah ngagai temuai.
“Atur tu tau mulaika pemaik sereta penguntung ngagai rayat lalu kami ngarapka palan tu ulih matak mayuh agi temuai datai,” ku iya.
Dalam timpuh enam bulan iya nya berengkah ari pun taun tu nyentuk ke bulan Jun 2012, urung 15,000 orang udah datai mandi ba Telaga Ai Angat (Hot Spring) Panchor Dayak.
Telaga tu diberitaka tau ngubat bemacham bansa penyakit lalu nya nyengkaum sakit jantung enggau kemi manis.
Kelimpah ari nya, Ku Dawos,sepenyampau RM4.6 juta udah diungkupka ngagai projek ke sebaka dalam kandang endur parlimen Mambong alai ari penyampau nya Telaga Ai Angat ba Genturung Tumpuk Pendiau (GTP) Annah Rais nerima RM500,000, pengawa ngemanah Rumah Pesaka Brooke di Gunung Serumbu enggau kereja ngaga jalai kaki ngemata bungai Rafflesia ba GTP Timurang.
Bela datai Tuai GTP Panchor Dayak Tapok anak Rayen, Sekretari Bagian Infrastruktur Opis Menteri Dagang Temuai Azmi Ali enggau orang bukai.