Telaga Ai Angat Panchor Dayak tau nyumanka penyakit

0

NGICHA: Temuai ke datai ba Te-laga Ai Angat (Hot Spring) Panchor Dayak mandi ngichaka tau nyuman penyakit ti ditapi sida.

Orang ke ngidap sakit jantung enggau kemi manis ulih gerai sepengudah sida mandi

PADAWAN: Telaga Ai Angat (Hot Spring) Panchor Dayak, Padawan tau ngubat mayuh macham bansa penyakit.

Sapit Menteri Dagang Temuai Dato Dr James Dawos Mamit madah bisi kala nyadi alai orang ke ngidap sakit jantung enggau kemi manis udah gerai sepengudah sida iya mandi ba Telaga Ai Angat Panchor Dayak.

“Bisi tiga iku orang ke ngidap sakit jantung udah datai mandi ngagai telaga tu. Enam bulan udah nya, sida tiga tu nadai ngidap penyakit nya agi.

“Orang ari pelilih Lawas enggau Kapit bisi mega datai mandi ngagai telaga tu ngichaka tau ngeraika penyakit ti diidap diri nyengkaum sakit kemi manis sepengudah ninga berita ari bala kaban,”ku iya.

Dawos mansutka jaku tu ba pengerami bejadika Projek Ngangkatka Perengkaguna Dagang Temuai Hot Spring Panchor ditu, kemari.

Ku iya, dalam timpuh enam bulan berengkah ari pun taun nyentuk ke bulan Jun 2012, urung 15,000 orang ari dalam enggau luar menua udah datai mandi ba telaga nya taja pan palan nya bedau dikelaku ngagai mensia mayuh.

Iya mega madah telaga ai angat ba Panchor Dayak bebida enggau ke bisi ba palan bukai alai ai angat nya pansut ari tanah paya.

“Air angat ditu pansut ari tanah paya ke tumbuh rumput. Maya ai angat tu bechampur enggau utai kimia ari tanah, tu ngadaka sebengkah ubat ti tau ngeraika penyakit,”ku iya.

Telaga Ai Angat Panchor Dayak ngembuan lima buah telaga sereta disikap enggau kantin, bilik endur begari sereta opis.

Dulu agi ari nya, Tuai Kampung Tapok anak Rayen ba jaku iya minta perintah nyendiaka bekal lekterik sereta paip ai beresi ngagai palan nya.

“Orang nyau majak mayuh datai ngagai palan tu. Bekal lekterik enggau paip ai beresi sigi diguna dikena meri pengelantang ngagai orang ke datai.

“Kitai mega minta perintah ngemesaika agi palan endur beputar ngambika bas ke suah nganjung temuai ulih beputar enggau mudah,”ku iya.

Projek Ngangkatka Perengkaguna Dagang Temuai Hot Spring Panchor nerima belanja RM450,000 ari opis Menteri Dagang Temuai Malaysia.

Kereja ngemanahka perengkaguna berengkah ba bulan Disember 2011 lalu tembu ba bulan Mei tu tadi.