KUCHING: Rayat nengeri tu dilalau ngerebut penemu sains enggau teknologi ngambika menua tu majak maju sereta ulih besemekih ba renggat dunya jemah ila.
Kepala Menteri Pehin Sri Abdul Taib Mahmud madah, pemansang enggau pemujur Sarawak engkeman lebuh rayat disikap enggau macham penemu nyengkaum pengelandik ba bidang sains enggau teknologi.
“Dalam dunya moden, rayat nengeri tu patut ngemeran enggau beratka penemu sereta pengelandik sains enggau teknologi, awakka ulih besemekih ba renggat dunya.
“Nya alai ngatur Karnival Sains enggau Inovasi nya sebengkah chara ti engkeman kena nyikap rayat lebih agi nembiak rebak baru ngena penemu sains enggau teknologi,” ku iya.
Taib bejaku lebuh bejadika Regatta Sarawak 2012 enggau Karnival Sains dan Inovasi Sarawak 2012, ti diatur begulai Opis Menteri Dagang Temuai Sarawak enggau Opis Menteri Sains, Teknologi enggau Inovasi (MOSTI) ba Tebing Ai Kuching ditu, pagi kemari.
Iya ti ngenang dua bengkah pengerami diatur begulai madah, nya mega juluk perintah ti deka nyemelaka pemansang nengeri enggau menua tu.
Rayat patut ulih mansang setipak enggau ubah dunya ti deka ke rayat bepengerai enggau bepenemu, ku iya.
“Nya alai kena meh pengerami Regata nyadi pelasar kitai begulai enggau pangan diri. Karnival Sains enggau Inovasi mega patut nyadika penambah penemu nembiak rebak baru seraya berami ba pengerami Regata ke bisi sejarah kediri empu,” ku iya.
Ba pengerami ti sebaka Taib diberi basa meri perais ngagai Lima Hasil Inovasi Akar Umbi Terbaik Jejak Inovasi, nyuaka setipikit Malaysia Book of Records ngagai nembiak UiTM Samarahan ke mujur ngerikutka pelanda beganti-ganti sepengelama 120 jam ngena ‘treadmill’.
Kelimpah ari nya, Taib ngarika pengatur pengerami nya nerima Replika Cek Tajaan Sarawak Regatta 2012.
Bela datai ngulu pengerami nya kemari, bini Taib Puan Sri Ragad Kurdi Taib, Sapit Kepala Menteri Datuk Patinggi Tan Sri Alfred Jabu Numpang, Menteri Dagang Temuai Sarawak Datuk Amar Abang Johari Tun Openg, Menteri Sains, Teknologi enggau Inovasi Datuk Seri Panglima Dr. Maximus Johnity Ongkili enggau pemesai kebukai.