KUCHING: Seiku bekau pengajar sekula primari ke menyati tiga iku anak murid beumur antara 10 enggau 12 taun ke udah, belabuh bejalaika ukum jil tiga taun pengudah Kot Apil mutus penyalah nya lalu ngelabuh ukum jil kemari.
Tiga iku panel nyengkaum Datuk Seri Mohamed Apandi Mohamed Ali, Datuk Anantham Kasinather enggau Datuk David Wong Dah Wah muai apil pengambis Mohd Yusahairee Md Yusup.
Yusahairee kena tinggang ukum jil setaun enggau sipat sekali ungkup genap tuduh ba Kot Seksyen kena 16 Feb ngena jalai pejal menyati anak murid sekula ba bilik rumah iya di kuarters Sekolah Kebangsaan (SK) Penghulu Imban Batu 38, Sekim Sekuan, Stapang di Dalat, antara 1 March enggau 31 March 2004.
Iya dilabuhka chaj menyati di baruh Seksyen 354 Kanun Keseksaan ke mai ukum jil naka 10 taun ukum mata duit enggau sipat tauka kededua ukum nya.
Ngelabuhka ukum nya kemari, Hakim Apandi nguluka forum madahka nadai kebuah ngeruga batang penemu ke betul bepelasarka saksi ke diberi.
Orang ke ngapil tu maya nya suba pengajar Matapelajar Jasmani ke mega ngajar semua bala nembiak tu.
Sida nembiak tu diasuh datai kediri ngagai kuarters mai beg.
Lebuh sida nembiak indu datai ngagai bilik iya orang ke ngapil tu ngemba sida lalu ngayah terus ngayah sida .
Sida ngerandau diri sekaban nama ke digaga orang tu ngagai sida, nyau udah setaun baru madahka pekara tu ngagai apai indai sida.
Raban apai indai udah nya ngaga riput polis ngelaban orang tu.
DPP Tetralina Ahmed Fauzi enggau DPP Mahadhir Mohd Khairudin bedawaka kes.