SRDC enda chukup belanja sekumbang pegai penyakal: Laju

0

UNGKUP YB: Tan (empat kiba) nyuaka tepa ngagai Wong (tiga kanan) seraya diperatika James Laju (tiga kiba), Ting (dua kanan) enggau sida ke bukai.

SIBU: Opis Pelilih Menua Pesisir Sibu (SRDC) napi penanggul ngulihka belanja ti chukup dikena bejadika projek pemansang ba menua pegai iya kenyau penuduk Parlimen Sibu dipegai raban penyakal.

Chairman SRDC James Laju Ambok madah, kenyau penyakal megai penuduk nya dua taun ke udah, opis sida napi penanggul maya nganjung peminta ngagai perintah besai dikena ngaga projek pemansang.

Beduduk ari nya, ku iya, semua raban opis aruh nyukung chalun Barisan Nasional (BN) maya pengawa bepilih besai Ke-13 (PRU13) deka datai.

“Pelaba aku rayat ba Bawang Assan udah ngasaika pengurang lelebih agi ba sida ti nyukung penyakal.

“Penyakal untung tang kitai rayat rugi laban peminta kitai ngagai perintah besai enda ulih dikemendarka.

“Nya alai, semua kitai aruh nyukung BN maya pengawa bepilih deka datai,” ku iya maya bejaku ba Pengerami Kuih Bulan ke diatur SRDC di Sungai Maaw, malam ensana.

Pengerami nya dipenyadika Menteri Wang II Dato Sri Wong Soon Koh. Bela bisi datai maya tu iya nya Sapit Chairman SRDC Clarence Ting enggau chairman komiti pengatur Tan Ching Teck.

Ku James nampung jaku iya, mensia mayuh lebih agi ba Parlimen Sibu enda patut ngaga penyalah ke sebaka maya PRU13 tu.

Maya bejadika pengerami nya, Wong ngarapka mensia mayuh enda ngira bansa tauka jalai pengarap ulih beserakup ba mayuh bengkah pengawa baikka raban nembiak, lumba enggau main sereta progrem main asal.

Iya ti mega Menteri Kunsil Kandang Menua enggau Pemansang Raban Bansa madah, perintah semampai ngarapka rayat ulih idup begulai enggau pangan diri.

“Tu ngambika kitai diau ba menua ti likun sereta seruran mansang,” ku Wong ti mega Kaban Kunsil Nengeri (ADUN) Bawang Assan.