Transformasi renggat kedua S’wak bepelasarka penemu

0

ALEXANDER

KANOWIT: Sarawak diatu benung ba proses nuju tranformasi ba renggat kedua arus pemansang enggau penatai pemisi ti bepelasarka penemu.

Berindik ari nya, Kaban Kunsil Nengeri (ADUN) Ngemah Alexander Vincent madah, perintah nengeri nyeraka modal mensia ti bepengelandik ba pekara vokasyenal, sains enggau teknologi, agropolis, pengerai, pelajar enggau teknologi pemadah enggau penyambung (ICT).

Ku iya, perintah nengeri nemu pemayuh nembiak tembu belajar ti enda nampung pelajar formal ninting taun.

“Ba taun 2011, sepenyampau 35,000 iku nembiak di Sarawak tembu peresa SPM enggau 6,000 iku tembu STPM.

“Raban tu aruh dibantai enggau awak belajar, pemansang, progrem pematih enggau pengawa puang laban sida modal mensia ungkup pemansang menua tu jemah ila,” ku iya.

Iya mantaika pekara nya maya ngarika Menteri Muda Pemansang Tanah enggau Menteri Muda Dagang Temuai Datuk Gramong Juna bejadika Pengerami Nutup Progrem Pemansang enggau Pemujur Ruang Bilik sereta Nembiak Sekula sitak Sibu renggat I/2012 ke diatur ba Sekolah Menengah Kebangsaan (SMK) Sedaya ditu, Hari Enam tu tadi.

Progrem nya diatur belabuh 21 ngagai 23 September lalu dipenyadi begulai enggau Opis Residen Sibu, Opis Pelilih Kanowit, Opis Menteri Pemansang Rama (KPS) Nengeri Sarawak, Opis Pelajar Kanowit, Opis Menteri Dagang Dalam Nengeri, Koperasi enggau Pekara Bebelika Barang  (PDNKK)pampang Sibu enggau SMK Sedaya, Kanowit.

Ku Alexander nandu jaku iya, progrem ke diatur ungkup nembiak enggau bala bapa indai nya engkeman bendar laban bala nembiak deka napi peresa PMR enggau SPM enda lama agi.

“Nya alai, aku ngarapka nembiak ti udah tembu SPM ulih milih jalai kediri empu enggau landik. Sida ulih milih ba pekara pelajar, vokasyenal tauka pengelandik.

“Sida ti bulih pemutus ke manah tau nampung pelajar ngagai tikas ti tinggi agi.

“Aku ngelalau bala nembiak ke udah tembu belajar tang enda mujur nampung pelajar ba palan pelajar tinggi ulih ngiga awak ngulu palan pematih perintah tauka kompeni luar ti bekaul enggau awak gawa ba Projek Kuasa Tau Dikena Baru Sarawak (SCORE),” ku iya baru.

Bela bisi datai maya pengerami tu iya nya Sapit Residen Sibu Dr. Zufar Salihin, Pemangku Pemesai Pelilih Kanowit Ibrahim Kipli, Kepala Pengajar SMK Sedaya William Baja Jap sereta bala pemesai raban bansa ke bukai.