BEGEMPUNG NGANGKATKA PELAJAR JAKU IBAN: Pengajar Harold (kanan) begulai enggau dua iku pangan iya ke ransing deka ngubah sereta ngemansangka pelajar jaku Iban di sekula.
Berindik ari peneras ubah, Sistem Jaku Iban Di Sekula patut diserenih, ditisih dikena nangkup semua bidang
JAKU IBAN udah datai ba tikas ti patut nerima paradigma baru ngambi ke seraris enggau pemansang dunya ti balat kena segang umbak dunya globalisasyen.
Berindik ari tu, semua bansa Iban udah datai ba maya ti besengkukut, maya besaup, maya berakup begembar bau sama-sama menatika pemansang jaku Iban Iaban enda ngira latar pendiau enggau pengidup, enda ngira pengaya enggau pemerinsa, enda ngira pemandai enggau penambap, enda ngira ideologi politik lalu enda ngira penatai ari ai enggau menua siti-siti.
“Semua bansa Iban ngembuan tanggungpengawa berakup ngemansangka jaku Iban,” pia ku Pengajar Harold Unsie Liban lebuh bejuraika Transformasyen Sistem Sepil Jaku Iban Di Sekula : 1Sistem, 1Jaku, 1bansa ba sebengkah Randau Pelajar Jaku Iban ti diatur Kelab Sosial enggau Rekreasi Saribas, apin lama ke udah.
Ku iya, turuka wang enggau ringgit, gelumuka akal enggau kira, kukun kuasa enggau autoriti sereta temukuka pengering enggau pengeliat ari deka ngambat paradigma baru dalam ubah sistem jaku Iban.
Semua tuai bansa Iban ke bisi kuasa enggau autoriti mesti nyimpan pengeransing sereta pengandal ati ‘bejakuka’ sentang hal jaku Iban ba dini-dini pelasar ti alai sida bediri megai pengawa ngambika jampat didinga orang ke lebih bekuasa.
Saum Siti Sistem Jaku
Dalam millennium ti balat tujah chabar baka ke diatu, jaku Iban enda ulih lari ari ti ngembuan siti jaku ti lati, siti sistem ti tuchi sereta enggau bansa ti pegari.
Udah datai ba maya semua opis perintah, agensi perintah, gerempung enggau serakup, kompeni penyelak, media sosial enggau semua ti bukai saum lalu ngerengkun siti sistem jaku Iban ti nyerangkung sistem sepil enggau sistem jalai jaku.
Sistem Jaku IBan Di Sekula ti dikena diatu udah patut disilih ganti enggau Sistem Jaku Iban Standard. Juluk ati kitai deka ngembuan 1Sistem, 1Jaku, 1Bansa mesti deka dipenyadi.
Daya Besemekih
Peneras pemansang jaku Iban ba dunya kemaya hari tu bepanggai ba pengangkun semua bansa Iban ke ngena jaku nya dalam komunikasyen besesehari.
“Ari ti angkun, andal sereta temegah ngena jaku diri empu, nya tau ngujungka jaku Iban ukai semina lebih entap, lebih tegap tang mega nyadi pugu tangkai penyerakup bansa Iban,”
Kelimpah ari bansa Iban empu, bansa bukai ke masai mendingka jaku Iban tau jampat mereti ti ngujungka jaku tu tau dominan lalu ngerembai ngagai bansa Iban.
Berindik ari nya, jaku Iban mesti ngembuan daya besemekih enggau jaku bukai ti lama udah bisi pengentap sereta penegap.
Penutup
Jaku Iban endang amat jaku llama, jaku kelia, jaku tuai ti nyadi pesaka diaris ari aki ini jeman kelai.
Kenyau ari jaku tu dibai pindah ari menua asal neresa mayuh jeman, nujah mayuh menua, iya sigi agi tuchi beresi, agi lati ti ngasuh iya meruan dikeangkun, dikeandal bansa Iban nyentuk ke millineum tu.
Mayuh ubah enggau pemansang udah nyadi dalam jaku Iban.
“Diatu pemansang jaku Iban nyau jauh nyulut enti dibandingka enggau jeman kelia menya”.
Kelimpah ari ti dikena bejaku, jaku Iban mega dikena berandau dalam media sosial baka dalam internet, blog, facebook enggau twitter tauka dalam media chelak ti nyadi kereban bacha baka bup, majalah, lambar keretas enggau utai bukai.
Berindik ari peneras ubah nya, dia Sistem Jaku Iban Di Sekula ti dikena patut diserenih, ditisih, diseruri sereta patut ditambah manah agi ngambika iya ukai semuti ulih nangkup ungkup dalam sistem pelajar sekula tang mega mungkur semua bidang ti bukai.
Jaku Iban patut ngembuan SISTEM JAKU IBAN, siti dokumen menuku ti nyadi kereban sanding ke semua orang ti belajar sereta semua bidang pelajar ti begunaka iya jemah ila.
Pengentap enggau penegap jaku Iban bepanggai ba penguat iya besemekih enggau jaku bansa bukai ti seruran nyeging, seruran nating, seruran ngining deka ngerengkap, deka nengkerap, deka munas, deka mukaska iya ngambi ke iya lalu nyelelang midang.
‘JAKU LATI, BANSA PEGARI’.