MPUB ngatur Seminar Ngerejister Dagang enggau Awak Bejual Asil kena 2 Oktober

0

SRI AMAN: Kunsil Pemansang Orang Dagang Bumiputera (MPUB) Sri Aman deka ngatur Seminar Ngerejister Dagang enggau Peluang Nyual Asil Nengah Internet 2012 ba Librari Kunsil Pelilih Mit Sri Aman (MSA) kena 2 Oktober tu.

Program diatur begulai enggau Unit Pemansang Orang Dagang Bumiputera (UPUB) Opis Kepala Menteri, dikena ngerembaika pengawa dagang raban bansa Bumiputera ditu.

Residen Sri Aman, Johnathan Lugoh madah, orang dagang Bumiputera ditu patut nguna awak nya ngerembaika produk sereta dagang sida nengah  internet.

“Internet ulih nyadika pelasar ngerembaika bungkur dagang besai agi. Aku arap endar ati, orang dagang Bumiputera tejapaika pemujur ke manah enti dibanding enggau ke sebedau tu,” ku iya lebuhka meri Penerang Pengawa Dagang enggau Mini Ekspo Industri Pelilih Mit Menua (SDSI) ba Tebing Batang Lupar, ditu ensanus.

Pengerami nya udah dipenyadika Kaban Parlimen Sri Aman Masir Kujat.

Orang Dagang Bumiputera ke bisi ati masuk ba seminar tau betemu enggau Chairman MPUB Sri Aman, Hamsein Atar ba Opis Residen Sri Aman.

Ku Johnathan, sida deka regas agi ngerembaika program latih dalam industri taun tu enggau taun baru.

“Diatu kami benung ngulihka penerang ari bank sereta ngelala dagang raban Bumiputera ke udah mujur ditu.

“Nengah penerang nya ila, kami milih dagang ti dipejalaika orang dagang Bumiputera ke udah mujur lalu dikemeratka dalam program nya ila,” ku iya.

Ku iya baru, orang ke masuk ba program nya deka diberi awak belajarka chara orang dagang ke udah mujur dalam kandang timpuh ke ditetapka.

Bela bisi maya nya, Sapit Residen (Bagi Pemansan) Sri Aman Hamsein Atar, Sapit Residen (Bagi Rama) Sri Aman, Felicia Tan enggau D.O Sri Aman, Ismawie Salleh.