KUCHING: Industri kayu Sarawak disadang mengkang tegap sereta ulih besemekih di makit antarabansa nengah iring raban ke tuai maya ke diatu, ku Kepala Menteri Pehin Sri Abdul Taib Mahmud.
Ku iya, entara pengawa manah ti udah diadu dikena nyapai juluk iya nya meri lisin nanam kayu dalam kampung (LPF) ngagai kompeni ngambika bekal kayu tu meruan sereta chukup kualiti.
“Kitai nagit ulih nanam baru kayu dalam kampung sepemesai sejuta hektar maya manggai ba taun 2020 ngambika industri tu ulih ngati kediri napi peminta makit alai tu mega setipak enggau juluk ngangkatka Sarawak nyadi sebengkah nengeri ke ngembuan penatai pemisi ke tinggi.
“Iring ti manah deka nentuka industri kayu ulih besemekih ba makit antarabansa,” ku iya ba pengerami makai lemai ninting taun Sarawak Forestry Corporation (SFC) ditu, malam ensanus.
Iya nambah, pengawa nanam baru kayu dalam kampung ukai dikereja enggau tuju komersyel tang mega deka nyaup ngintu pemaik rampa menua ti balat dikemerat perintah nengeri.
Sarawak ngelamatu udah ngereja pengawa lebih ari ke patut dalam atur ngintu kampung.
Iya madah Sarawak dulu agi ari menua bukai ba pengawa nya alai enam juta ari penyampau 12 juta hektar kampung udah ditanam enggau kayu baru.
Pemujur nya dijapai ketegal perintah nengeri ngembuan polisi kampung ti manah sereta nengah saup ari raban SFC ti landik dalam pengawa ngintu kampung.
Iya mega madah mensia mayuh deka majak nerima penerang senentang pengawa perintah ti angkun ngintu pemaik kampung.
“Nyendiaka penerang ke amat ulih nyeliah mensia mayuh ari dikemula sekeda raban,” ku iya.
Ba kaul ke sebaka, Chairman SFC Datu Dr Yusoff Hanifah madah program nanam baru kayu kampung matak pengawa ngerintis teknologi baru ke diguna kena ngangkatka rega produk kayu.
Ku iya, Sarawak Forestry nanggam kerejasama begulai enggau industri batang ke bekait enggau atur pemansang enggau pansik (R&D) sereta latih pengawa nanam kayu kampung.
“Kitai perchaya atur tu deka ngenegap program nanam baru kayu kampung ngagai renggat ke tinggi agi,” ku iya.
Taib ba pengerami nya bisi mega ngelanchar bup mija kupi “Sarawak Planted Timber, Beyond Pulp and Paper”.