Sida aruh ngemeran penyikap sereta ngemerat pengelandik teknikal dikena napi peminta pengawa
KUCHING: Orang indu diperansang chakah ngambi bagi ba bidang teknikal dikena nangkup peminta guna pemansang industri nengeri tu, lebih agi SCORE.
Kepala Menteri Pehin Sri Abdul Taib Mahmud madahka, naka ke diatu penyampau orang indu dalam bidang teknikal enda chukup ke guna jemah ila.
Kemaya hari tu nunjukka penegap, pengelebih enggau pemayuh orang indu enti dibandingka enggau lelaki, ke mandangka orang indu ulih nundaka peneka pemansang menua, ku iya.
“Enti di Sarawak pemansang kitai engka bebida ari menua bukai, laban SCORE ngemeran sereta ngemeratka pemansang industri, ti begunaka pengelandik teknikal.
“Nya alai aku minta orang indu (nengeri tu) patut bebendar sereta chakah agi ngambi bagi ba bidang teknikal (kena napi peminta ari SCORE).
“Diatu endang udah bisi iya nya lebih 40 persin sereta nyauka manggai 50 persin orang indu ngambi bagi dalam bidang teknikal, tang penyampau nya enda chukup kena nangkup peminta guna jemah ila,” ku iya.
Taib mansutka penemu nya lebuh bejadika pengerami Hari Orang Indu 2012 Renggat Nengeri Sarawak ke diatur ba sebengkah hotel ditu, kemari.
Pengerami Hari Orang Indu 2012 ti ngena rambai jaku “Wanita Penjana Ekonomi Baru, Pendokong Semangat Kesukarelaan” diatur begulai Biro Wanita, Opis Menteri Pengintu Pengelantang, Orang Indu enggau Pemansang Ruang Bilik sereta Majlis Wanita & Keluarga Sarawak.
Nambahka nya iya mega meransang orang indu nengeri tu ngambi bagi dalam bidang Kejuruteraan Mekanikal setipak enggau peminta guna SCORE.
“Nya kebuah orang indu patut nyikap diri ngambi teulihka penyulut sereta pengelui ari lelaki,” ku iya.
Kelimpah ari nya Taib ngarapka orang indu di nengeri tu ulih nyendika diri napi ubah raban bansa sereta pemansang ekonomi enggau sosial ti jampat enggau mayuh pemar.
Bela bisi ngulu pengerami nya kemari, Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah, Puan Sri Ragad Kurdi Taib, Datuk Sri Empiang Jabu enggau ke bukai.