BINTULU: Perintah menua dipinta ngemeratka penanggul ti ditapi rayat di menua pesisir lebih agi ba pekara ke mungkur perengkaguna, ku Ketuai Parti Keadilan Rakyat (PKR) pampang Bintulu Paul Raja (gambar).
Ku iya, pengari rayat ke dipilih ba sesebegkah sitak sekalika Kaban Parlimen tauka Kaban Kunsil Nengeri (ADUN) patut bejalaika tanggungpengawa sida enggau manah sereta nyendiaka semua perengkaguna ke diguna rayat ba sesebengkah menua.
“Baka ke dipeda aku diatu, perintah Barisan Nasional (BN) ke megai perintah kurang ngemeratka perengkaguna ke diguna rayat baka karan, ai enggau jalai alun,” ku iya bejaku ba aum media kemari.
Iya ngenang pekara nya sepengudah raban PKR nemuai ngagai Nanga Ngungun Kanowit apin lama ke udah sereta nemu sitak nya ke tebal diuan raban bansa Iban bedau bisi karan, ai enggau jalai alun.
Diatu ku Paul, tebal agi rayat di rumah panjai kandang menua Nanga Ngungun betengahka ai, ke nyadi penyambung entara sida enggau mensia bukai sereta mega nurun ke pasar, bedau baka 50 taun ke suba.
“Tu meh kedeka ditemu kami, nama kebuah nyentuk ke diatu Nanga Ngungun lalu nadai jalai taja pan menu Malaysia udah merintah diri lebih ari 50 taun?,” tanya Paul.
Ku iya, penimpang ba Nangan Ngungun nya meh ke kelai perintah enda mujur bejalaika tanggungpengawa sida enggau manah sereta ngenusahka pengidup rayat ba menua nya ngubah status sosioekonomi sida, ti mengkang ngembuan jalai pengidup baka ke kelia lalu tinggal jauh ari pemansang.
Ku Paul, agi mayuh chunto ba endur ke bukai di menua tu lebih agi ba menua pesisir ti tulin bedau bisi perengkaguna. Nya endang tanggungpengawa perintah BN nyendiaka utai ke diguna rayat enti sida amat bebendar nyadi ketuai sereta megai menua tu.
“Baka ke ditemu kitai, perintah besai udah ngungkupka belanja ke besai dikena ngaga sereta ngemanahka perengkaguna di menua tu.
Perintah mega patut menchelakka mata sida sereta bechuntoka kes ba Nanga Ngungun ke nadai jalai alun, karan enggau ai beresi 24 jam.