Yong: SAIP aruh mantu sekula ba pengawa ngajar enggau belajar

0

KUCHING: Tanggungpengawa Serakup Apai Indai Enggau Pengajar (SAIP) ukai semina begumpulka duit dikena sekula bejalaika atur pengawa tauka ngemanahka rampa sereta kan­dang sekula aja tang mantu pen­gajar nambahka aktiviti pengawa ngajar enggau belajar, ku kaban parlimen Stampin Dato Yong Khoon Seng.

Dalam teks jaku ke dibacha chairman SUPP Batu Kawah Tan Joo Phoi, Yong nyebut ngagai apai indai nembiak sekula ba Pengerami Makai Lemai seraya Ngumpul Wang Turu SAIP Sunny Hill meransang sida chakah ngambi bagi ngemataka pelajar anak sida nengah ngulu aum serakup nya seraya bekem­pit enggau bala pengajar awakka nyungkak pemanah pemutus peresa anak.

Anang semina manggai semua tanggungpengawa ngagai penga­jar aja,” ku iya.

Ku Presiden Seventh Day Adventist Mission Sarawak, Pastor Lawrence Banyie ke mega Chairman Kunsil Sekula Sunny Hill, bisi sekeda projek udah diperambu.

Projek tu nyengkaum masang CCTV, ngemanahka kaki lima ba lumpung sekula primari enggau bup bacha baru ungkup librari sekula primari.

Sekula sekondari nya begunaka keresa baru, seraya rumah sekula nya mega deka dichat. Duit ke digumpul nya deka diekena nyeruri atap oditorium.

Dalam jaku iya, presiden SAIP nya Hazel George madah, apai indai nembiak sekula aruh bekempit enggau sekula dalam mayuh bengkah aspek pelajar anak laban tu deka mai mayuh penguntung.

Malam nya bala nembiak sekula bisi mantaika macham bengkah tanda dikena merindang temuai.