NGIGA ASAI: Lai (empat kiba) enggau Engga (enam kanan) sereta sekeda ari bala raban ke bukai mantaika pemutus ngemaduka diri nyadi kaban SPDP ba Rumah Das, ditu kemari.
SIBU: Lebih 900 iku kaban Parti Demokratik Progresif Sarawak (SPDP) pati Stapang enggau Bukit Assek ngaga pemutus ningkilka diri ari parti nya, kemari.
Chairman SPDP pati Stapang ex-kunsilor Lai Lidi madah, raban bagi pati sida ti ningkilka diri iya nya sepenyampau 230 iku lalu tebal agi ari penyampau tu sida serumah.
“Sehari tu (kemari), kitai bagi SPDP pati Stapang madah enggau lantang ati deka badu nyadi kaban parti tu agi,” pia ku iya madah maya pengawa nyerahka kad raban parti ba Rumah Das Jerman, Batu 30, Stapang ditu.
Ku iya, pengawa sida ti ngaga pemutus nya ukai ketegal bisi laya ba parti tang ngasaika udah maya iya pemutus nya digaga.
“Kitai ukai ngenggaika sapa-sapa tang kami ngasaika udah tu kami deka ‘ngenduh’ dulu ba Kelab Penyukung Barisan Nasional (BN),” ku iya ti udah 10 taun nyukung parti nya.
Lai mega madah, udah tu ila, raban sida nadai sekat nama kediri ngagai nama-nama parti tang ukai parti penyakal.
Ku iya, taja pan badu enggau parti nya agi tang tu ukai mandangka sida enda rinduka parti komponen BN.
“Maya pengawa bepilih besai tu ila pan kami endang segi nyukung BN.
“Kebuah pia laban ulah ti angkun ngagai perintah BN agi mengkang ba kami,” ku iya madahka baru.
Chairman SPDP pati Bukit Assek ex-kunsilor Engga Unchat mega madahka raban ari pati sida bisi 700 lebih iku ngaga pemutus ti sama.
Ku iya, penerang madahka sida badu enggau parti nya deka dianjung ngagai sekretari besai SPDP ujung bulan tu.
“Pemutus tu digaga nadai tentu kebuah tang kami madahka diri balat deka nyukung Kelab Penyukung BN,” pia ku iya seraya madah seduai iya Lai dulu agi ngemaduka diri ari bala bukai iya nya kena bulan September tu tadi.
Taja pan baka nya, iya ngarapka pemutus sida ulih dipebasa raban ke bukai nambahka mega sida enda tebiuh ngelaban pegai perintah BN tauka nyukung komponen parti penyakal ke bukai.
Engga mega pechaya penyampau tu deka nambah baru udah tu ila.
Kelab Penyukung BN ditumbuhka sepengudah Kaban Parlimen Mas Gading Datuk Dr Tiki Lafe, Kaban Kunsil Nengeri (ADUN) Bekenu Rosey Yunus, ADUN Batu Danau Paulus Palu Gumbang, ADUN Marudi Sylvester Entri Muran enggau ADUN Tasik Biru Datuk Peter Nansian ditingkilka ari SPDP.
Sebedau tu mega, nitihka riput, lebih seribu iku raban pati SPDP ba Bau ningkilka diri kena bulan April tu tadi lalu ditangkan raban ba Marudi kena bulan Mei.