Saturday, May 8

Pengawa nyukat kelingi ngirauka pengempu tanah

0

KUCHING: Penerang ke enda silik ari perintah pasal pengawa nyukat kelingi Tanah Adat Bansa Asal (NCR) ke ngujungka pengempu tanah irauka penuku entara tanah NCR enggau menua, ku Kaban Kunsil Nengeri (ADUN) Ba’kelalan, Baru Bian.

Iya madah baka tu lebuh aum media nimbal jaku Sapit Kepala Menteri, Datuk Patinggi Tan Sri Alfred Jabu maya mansut penemu ba Aum Kunsil Nengeri (DUN) Hari Ketiga, Aum Kedua ba Renggat Kedua, DUN ditu, kemari, ke ‘ngusut penemu’ madahka bida nyukat kelingi enti pengawa nya mungkur pemakai menua tauka pulau galau.

“Menteri nya seruran ngumbai kami penyakal enda betul nyerita ngagai peranak menua ngambika ngelaban pengawa nyukat kelingi.

“Diatu orang rumah panjai balat irau. Ari nya, terang bendar pengawa perintah nyukat kelingi tu mandangka atur dikena nyapat entara tanah NCR enggau tanah menua.

“Enti baka nya, semua orang deka nemu atur nyukat Tanah Adat Bansa Asal (NCR), enti iya nyengkaum pemakai menua enggau pulau galau,” ku iya seraya madahka Jabu tauka pengari ari opis perintah suah nyeliahka tanya nya lalu enda nyaut enggau engkeman.

Ku Baru, pekara tu berat bendar ba orang ke diau di menu pesisir tang pekara bansa tu jarang dipejurai.

“Aku semina minta Jabu nerang ngagai kami bida ba pekara besukatka tanah NCR lalu nyapat entara enggau tanah menua. Suah agi tanya kami enda disaut tang perintah ngasurka penemu madahka atur pemansang ke dipejalaika sida dikena munaska penyeranta raban bansa asal,” ku iya.

Dalam saut Jabu ngagai Baru bekait enggau pekara tu, iya madah dalam Kod Tanah (Land Code), tanah NCR diungkup dalam kod tanah.

Tanya Baru ba pekara kedua, pasal leka getah ke bekualiti, sekalikaulih tauka enda leka getah tu diambi ari Opis Betanam Betupi ba serata menua tu nyengkaum Lawas.

Jabu ti mega Menteri Betanam Betupi Moden enggau Menteri Pemansang Menua Pesisir madah, perintah ngemeratka tanggungpengawa ngemansangka genap sitak menua nengah pengawa betanam betupi ngambika ulih munas penyeranta.

“Aku udah ngaga peminta ari Perintah Besai lalu di sukung ulih Kepala Menteri berindik ari diatu ngagai taun 2020, betatika mensia mayuh di menua pesisir (baka ke disebut Menteri Besai), penyerata rayat patut dipunas.

“Nya alai program baka tu diungkup ngagai orang ke bekebun bedandang mit, enda ngira sida ke nanam baru tauka baru berengkah bekebun mungkur serata menua Sarawak,” ku Jabu.

Jabu madah, ninting taun mayuh tanah dibuka alai bekebun getah ngambika juluk kitai ulih japai. Sida ke bekebun bedandang mit ngaga program tu nyadi besai sereta ngelala utai tanam tu ulih mantu munaska penyeranta,” ku iya.