SELANGAU: Koperasi Penanam Sawit Pelilih Mit Selangau, Sibu Berhad ti ditumbuhka kena 5 Mei taun tu tadi deka dipenyadika kena 8 Disember tu ila.
Pengulu Jerampang Ratoh udah dipaduka nyadi chairman, Peter Unan Ima nyadi sekreteri lalu Ganggang Ngumbang dipilih nyadi tukang wang. .
Raban komiti koperasi nya ke bukai nyengkaum Pengulu Micheal Nyawai Jelani, Konsilor Ngumbang Awit, Jabieng Manjan, Lembang Tugang, Ubang Pandong, Tuai Rumah Bayang Intai lalu Seli Mohamat enggau David Joseph Pemesai Opis Minyak Sawit Malaysia(MPOB pampang Sibu) dipaduka nyadi kaban komiti Koperasi nya.
Koperasi tu ditumbuhka kena mantu mutarka penanggul nyual buah tandan baru (BTS) sereta ungkus betanam ke majak besai.
Koperasi tu mega nyendiaka servis sekim baru nanam enggau sekim numbuhka baru nengah kerejasama enggau MPOB.
Kelimpah ari ti bejalaika pengawa ngintu pengelantang pendiau enggau pelajar raban koperasi nya sebilik, orang bukai dalam kandang menua Selangau ke deka nyadi kaban koperasi tu enda tau enda peranak menua tu, sereta ngembuan pemesai kebun sawit ti enda ngelui 40.46 hektar (100 ekar) sereta dipinta mayar duit masuk nyadi kaban RM25.
Pengerami tu deka dipenyadika Sapit Menteri Pemansang Menua Pesisir enggau Pelilih Menua, Datuk Joseph Entulu Belaun ba Dewan SJK Tong Ah, Selangau pukul 8.30 pagi.
Kaban Kunsil Nengeri (ADUN) Tamin, Joseph Mauh Ikeh mega disadang sama bisi ngulu pengerami nya.
Berebak enggau pengerami nya ila MPOB, Kunsil Koperasi Malaysia (SKM) enggau CCM Fertilizer deka meri penerang bekaul enggau chara ngintu palan nerenakka paung,nanam sereta ngintu sawit, muai dan sereta ngarang buah, kimpin ngulihka kaban koperasi enggau maja.
Kaunter ngerejister kaban sereta lisin mega bisi dibuka ungkup orang ke udah nanam sawit tang bedau bisi lisin nyual sawit nya.
Sebarang tanya tau ditanya ngagai Jerampang nengah lumur 019-8287106, Peter Unan (019-8756134), Ngumbang (019-8587325), Seli Mohamat (013-8957373) enggau David Joseph (019-8263401)