Pemedis pengidup ke ditapi nyadi sengkuar

0

ENDA NEMU LEJU: Awang Nasfuddin (kiba) bekunsi pemujur enggau Pro Chanselor UiTM Tan Sri Nuraizah Abdul Hamid (tengah) enggau Rektor UiTM Sarawak Prof Dato (Dr) Jamil Hamali (kanan).

Dikena nyuluk palan, pemujur ke disepi bepugu ari pengeransing ngansah untakSAMARAHAN: Kala minta masuk belajar ba universiti lima kali, semadi meh ngapil baru mujur sereta kala gawa di restoran makai gaji RM440. Puas mega ngetatka pemedis ngidupka diri bepun ari nadai pemandai, diatu sebana Awang Nasfuddin Awang Hassan, ke bulih ‘Anugerah Graduan Terbaik Keseluruhan UiTM Sarawak (Sarjana Muda Sains Pentadbiran) (Kepujian) ditukar enggau pengaga.

“Ketegal udah ngasaika penusah, nya ngajar aku enda nyerah alah. Tiap iku kitai bepeluang ngasaika peluang kedua kali. Udah bulih peluang nya, anang sesekali muai peluang nya,” ku iya.

Awang Nasfuddin, ex-nembiak SMK (Agama) Tun Ahmad Zaidi, Matang, ke sama disempulang apai indai enggau menyadi iya, madah, taja pen lebuh bulih masuk UiTM suba, keterubah bisi berasai ngelusu mimit nurun kelas, tang udah puas berunding peluang baka tu ukai muntang diulih, nya ngasuh iya majak rajin belajar lalu nyadi orang ke pengabis mujur maya atur pengawa graduation tu tadi.

“Ulah ngelusu nyadi ke batang ke tau ngasuh kitai enda mujur. Tang aku beterima kasih ngagai apai indai aku laban sida iya ke seruran nyukung aku belama nyengkaum bala lecturer.

“Lebuh ngasaika enda mujur, nya ukai pengujung iya, tang peda ari sukut, singkang nya keterubah iya kitai angkat baru,’ ku iya madah lebuh dikerandau pemberita sepengudah pengawa Konvokesyen ke-77 UiTM Sarawak, kemari.

Ku Awang Nasfuddin baru, nyadi orang ke mujur dalam akademik, nadai resipi bukai tang meri focus 100 persin maya pensyarah ngajar, sereta rajin betanya enti enda nemu tauka enda entu mereti utai ke di ajar lecturer.

“Tang anang semina balat belajar, dataika nadai hari belumba enggau bemain. Dalam pendiau kitai, mesti bisi timbang ba pengawa bukai baka kurikulum lumba enggau main, laban semina nengah tu aja, kita begulai enggau orang bukai,” ku iya ke nyangka deka nyambung pelajar ngambi kos Polisi Pengawa Rama (Social Policy) di UKM tauka USM sereta kala nyadi Presiden Admin Sains di UiTM.

Enggi Debbra Toria anak Nipo, 21, ari Kuching ke bulih ‘Anugerah Graduan Terbaik Khas (Diploma) UiTM Sarawak ke dipelanja Yayasan Sarawak madah, nadai utai bukai ke ulih mantu kitai dalam pengidup tang seruran bebaik enggau orang bukai.

“Aku deka nyadi chunto ngagai nembiak Dayak bukai. Enti aku ulih mujur, nama kebuah sida iya enda ulih. Tang belajar meransang diri empu, anang sumbung, laban enti kitai sumbung, nadai ulih mai kitai kini-kini. Nambah ke nya, dalam semua pengawa ke digaga kitai, gaga enggau naka pemanah,” ku iya ke selalu bulih 4.0 dalam tiap pemutus peresa iya.

Debbra ti benung belajar di Sabah (ngambi Degree in Economics) mega bisi dua iku menyadi bukai ke sama pandai baka iya, beterima kasih ngagai apai (gawa di Sarawak Energy Behad) enggau indai iya ke seruran meransang, sereta mantu iya.

“Nyangka udah abis degree, aku deka nyambung ngambi Masters aku,” ku iya madah enggau ati gaga.

Suzzane Roxana anak Edward Ulok, 22, ari Kuching ngembuan penemu ke enda sebaka. Iya madah, duit ukai nyadi penanggul enti kitai deka mujur dalam pelajar.

“Nembiak bansa Dayak ke napi penanggul suntuk belanja kena belajar, UiTM bisi nyendiaka bantu lebih agi nembiak ari menua pesisir. Diatu, UiTM deka muka kampus kedua  di pelilih Samarahan, mayuh agi peluang kitai Dayak ulih belajar ba renggat ke tinggi,” ku iya lebuh dikerandau Utusan Borneo ditu, ensana.

Suzzane ke balat gaga bulih pemutus ke enda disadang ngemanah nya, laban ku iya kos tu ukai pilih keterubah iya, tang ke lumur dua.

“Aku bisi pengerindu dalam undang-undang. Maya aku ngambi pra-undang-undang di UiTM suba, aku antara nembiak ke diambi masuk ngambi Bachelor of Administrative Science, ke enda ibuh ngambi Diploma,” ku iya, ke madahka diri enda gaga bulih kos nya laban agi ngarapka nama iya dipasuk dalam kos undng-undang.

Tang ku Suzzanne, nyau pengelama udah nya, iya ngasaika kos nya dikerindu ke iya laban antara pekara dipelajar baka ‘Policy Study’ ke di ajar dalam kos nya bisi mungkur undang-undang.

“Enti kitai bisi juluk deka mansang, nadai kebuah enda belajar tinggi agi. Diatu dunya majak moden, kitai anak Dayak patut sama nyingkang enggau orang. Anang semina duduk meda orang aja, tang kitai pen tau maju baka orang bukai,” ku iya, ke udah gawa ba sebengkah kompeni sereta berunding deka ngambi ‘Masters’ di UiTM taun baru tu ila.

GAGA: Seraban ari nembiak ke udah mujur mandangka pengaga diri pengudah nerima skrol sida.

PENYUNTUK BELANJA UKAI PENANGGUL MUNTAT BELAJAR: Suzzane (tengah) antara pemayuh nembiak bansa Dayak ke bulih ‘First Class Honours Bachelor of Administrative Science’. Ditu iya bekunsi pengaga sereta begambar enggau sida sebilik pengudah Konvokesyen UiTM ke-77 ditu.

“PENCETUS TRANSFORMASI BANGSA”: Pro Canselor UiTM Tan Sri Nuraizah Abdul Hamid benung bejaku bejadika atur pengawa Konvokesyen UiTM ti ke-77.