CHAMPIAN: Andrian (kiba) nyuaka perais ngagai Upom Uget ke mujur megai gelar champian Pekit Nyumpit Lelaki. Bela bisi ayan David (dua kiba) enggau Jinggan.
BINTANGOR: Komiti Pengintu Pengelantang, Pengawa Rama enggau Main Asal Dayak (JKSKD) Taman Bintang ditu mujur ngatur Pengerami Diri Sebilik JKSD 2012, empai lama tu tadi.
Pengerami tu diatur lebih agi ngelawa tuju nyintalka kaul entara diri sebilik senutuk enggau rambai jaku gerempung nya ‘Beserakup Mai Pengelantang’.
Berebak enggau tu, Komiti Lumba Enggau Main JKSKD ti betuaika Jinggan Nyambong ngatur mayuh bengkah progrem nyengkaum pengawa beripai meresi Padang Futsal Taman Bintang, Pekit Main Futsal, Sukaneka Nembiak Sekula Primari, Pekit Nyumpit, Pekit Ngirup Ai Tuak enggau Serumpu Merarau.
Maya ke bejaku bejadika pengerami serak tu Sekretari Pelilih Menua Meradong, Julau enggau Pakan Andrian Luang meri puji ngagai semua raban JKSKD ketegalka ulih sa’ati begempung ngemujurka pengerami nya.
Berebak enggau tu mega, Chairman JKSKD, David Michael Jagok madahka diri temegah ati ketegal sukung enggau pengibuh sereta pengeran bala kaban JKSKD ngemansangka gerempung tu.
Ku iya, ketegal penyerakup tu mega, diatu gerempung nya mujur disempulang 103 buah pintu bilik.
“Kelimpah ari ngatur pengerami, JKSKD ninting taun udah mujur meri peransang tauka insentif dalam mata duit ngagai bala anak JKSKD ke udah mujur dalam peresa perintah.
“Ari pengeransing bala raban, gerempung tu bisi nerima bantu RM10,000 ari Kaban Parlimen Sarikei Ding Kuong Hiing ungkup Wang Turu Pelajar tu,” pia ku iya madah.
Nambahka nya ku David, wang turu tu dikena nyaup bala apai indai maya nganjung anak sida nampung pelajar ngagai tikas ti tinggi agi.
“Ukai semina nya, JKSKD bisi nyendiaka perengka baka pinggai mangkuk enggau kimis nyaup bala raban maya bisi pengerami tauka penusah rabat lalu pia mega bantu belanja RM200 ngagai sida ti bisi rabat,” ku iya madah.
Berindik ari nya, David nangkan bala Dayak ke diau ba Taman Bintang ngambika ngerejister enggau gerempung nya.
Pom tu ku iya tau diambi ba Sekretari JKSKD Nelson Sunting enggau Tukang Wang JKSD Lagang Jawang kelimpah dipinta matar semina RM5 aja nyadi kaban seumur idup.
Bala temuai ke bukai ti bisi datai ngulu pengerami tu iya nya Tuai Raban Bansa Taman Bintang Stewert Ngabong, Kunsilor Peter Saow enggau Tuai Rumah Seli ari Nanga Liuh, Julau.