SELAMAT: Raban HAZMAT Bomba dan Penyelamat nyelamatka mangsa ke bisi dalam rumah maya penusah pantis gas enggau angus nyadi.
KUCHING: Raban Hazardous Material (HAZMAT) Jabatan Bomba dan Penyelamat Malaysia Nengeri Sarawak deka ditambah sebuah agi perengka pengangkut, ti dipelabaka diberi taun 2013.
Direktor Jabatan Bomba dan Penyelamat Malaysia Negeri Sarawak, Nor Hisham Mohammad madahka, nya dikena nambahka perengka pengangkut HAZMAT ke udah bisi ba Balai Bomba Tabuan.
“Kediatu kitai semina bisi sebuah aja perengka pengangkut HAZMAT, lalu ba renggat tinda taun baru kitai deka nerima sebuah agi ti deka diungkupka ngagai Balai Bomba dan Penyelamat Bintulu, iya nya palan pemansang SCORE tauka kandang menua ti mansang ba industri gas enggau minyak.
“Kitai deka ngipakka enggau pemansang nengeri, penyauh sereta bida ungkus (perengka pengangkut nya), kitai enda nyangkal kitai patut ditambahka perengka pengangkut (HAZMAT) ba menua adap utara,” ku iya seraya madah taja pan industri kimia di Miri kurang tang industri berat diatu majak nambah.
Hisham mansutka pekara nya dalam aum pengarang berita, lebuh ditanya bekaul enggau penyukup perengka pengangkut HAZMAT Bomba dan Penyelamat di Sarawak.
Dulu ari nya iya ngemataka Latihan Bencana “D’Mex Kenyalang” (HAZMAT) ke diatur ba Loji Rawatan Air, Batu Kitang ditu, pagi kemari.
Nitihku iya, penyampau rega sebuah perengka pengangkut nya RM2.74 milliun.
Raban HAZMAT Sarawak ditumbuhka bulan March 2010, ti bisi 28 iku raban.
“Berengkah ari ditumbuhka bulan March 2010 nyentuk ke sehari tu raban HAZMAT betapi enggau tiga kes ke nyengkaum dua di kandang menua Kuching enggau siti di kandang menua Serian,” ku iya.
Pemadu tusah ke ditapi raban HAZMAT iya nya industri ti nadai sekat ke patut maya ngena barang (ke tau ngeruga pengerai), baka dalam industri mit enggau tengan pemesai (IKS) enggau kebukai.
Ngenang latih ti diatur ba Loji Rawatan Air, Batu Kitang, iya madahka bisi nyadi penusah angus enggau pantis klorin.
Tuju kitai ngatur latih ke diberi nama “D’Mex Kenyalang” 2012, ngambika ulih nemu timbal ari ijinsi bekaul, lebih agi dalam penyadi bekaul enggau barang kimia ke ngeruga pengerai.
“Nitihka penerang ti diterima aku, Lembaga Air Kuching (LAK) disikap ngena sistem perengka ke ulih ngembau gas, lalu kitai ngarapka sistem nya ulih dikena belama, dikemanah sereta diintu,” ku iya.
Lima ijinisi ti ngambi bagi ba latih pagi kemari bisi 88 iku, nyengkaum JBPMNS bisi 42 iku enggau Opis Ai Kuching (LAK) bisi 10 iku, Opis Pengerai (HUS) (lima iku), Majlis Perbandaran Padawan (15 iku), Jabatan Pertahanan Awam Malaysia (tujuh iku), Polis DiRaja Malaysia (tiga iku), Opis Rampa Menua (dua iku).