Tuesday, November 12

BOMBA beratka kes pantis enggau naya

0

KUCHING: Jabatan Bomba dan Penyelamat Malaysia Negeri Sarawak (JBPMNS) chukup beratka penusah ng­enyit bekaul enggau barang ngeruga pengerai ti pantis enggau naya, lebih agi dalam industri ais ti bekenaka am­monia.

Pengarah JBPMNS, Nor Hisham Mohammad madahka, industri ais di menua tu patut beratka pengawa ngadu sereta ngintu kereban ke dikena baka paip, kena nyeliahka ari se­barang penanggul.

Laban ku iya, pemar besai lebuh ammonia pantis sereta ulih dipeda tang ulih tama dalam kulit ngujungka dalam tubuh kitai rangkai, ku iya.

“Taja pia di Sarawak kes bekaul enggau ammonia tu nadai kala nyadi.

“Dalam industri ngaga ais pemadu patut dikemeran iya nya ngintu, nyaga sereta nge­manahka kereban ti dikena laban nya ngena paip, lalu orang ke ngempu industri patut nemu enti sema bisi penusah pantis nyadi.

“Nambahka nya patut nge­lala simptom ari penusah pantis nyadi baka luput, enti penusah ditemu nyadi semua orang ke gawa patut diasuh pansut sepengelengkas ke ulih kelim­pah ari nyendiaka latih tauka ngajar pengereja pengawa bekaul enggau pengelikun sereta pengerai,” ku iya.

Hisham mansutka pekara nya maya baum pengarang ber­ita Latihan Bencana “D’ Mex Kenyalang” tim HAZMAT (Hazardous Material) ke diatur JBPMNS ba Loji Rawatan Air (LAK), Batu Kitang, ditu pagi kemari.

Nitihku iya, penyampau kes penusah ngenyit bekaul barang kimia ti pantis enggau siuh nunjukka bisi nambah ba taun 2012 enti dibandingka enggau taun 2011.

“Nyentukka sehari tu dalam 2012 kitai (JBPMNS) bisi ngerikutka 155 kes, enti dibandingka semina 125 kes 2011.

“Tebal agi ba taun 2012 barang ke pemadu mayuh naya enggau pantis iya nya petro­leum bisi 132 kes. Barang kimia (Asid, alkali, bes) ngerikutka lima kes, barang ngeruga bukai (agen biologi, anthrax, radioaktif) dua kes enggau barang ke enda ngeruga baka minyak kelapa sawit enggau yis ngerikutka 16 kes.

Berebak enggau nya Hisham madahka chara inventori tauka nyimpan barang kimia patut betul sereta bisi rikut, ngam­bika lebuh penusah ti enda diadang nyadi, bisi penerang.