KUCHING: Raban ke mengkang pegari Band Kimara deka merindang mensia mayuh ba Borneo Ethnic Cafe (BE) kena 8 Disember tu berengkah ari pukul 8 malam.
Nitihku penerang berita, Band Kimara dikangau merindang mensia mayuh ba palan nya nyerumba enggau pengerami nyambut Hari Krismas ti deka datai.
Kelimpah ari beperindang, mensia mayuh ke bisi datai deka dirichahka agi enggau mayuh macham main ti ngerinduka ati. Pia mega, malam nya aktiviti belagu karaoke bisi diatur ngagai temuai ke deka nguji nyada nyawa diri.
Ba pengerami nya, pekit ngepan ke pemadu manah mega bisi diatur. Champian deka mai pulai perais ti ngemuaska ati.
Borneo Ethnic Cafe bepalan ba Jalai Song Kuching (belakang Starbucks Coffee) dibuka ninting hari berengkah ari pukul 6 lemai, iya nya siti palan ngena konsep tebuka engkeman enggau tagline, Ruai Endur Berandau.
Ba palan tu mega bisi nyual panggang jani, pansuh, lok-lok enggau pemakai bukai.
Penerang ke silik bekaul enggau pengawa nya tau betelefon ngagai lumur 013-8068978, 019-8775705 enggau 019-8789930 tauka ngelawa facebook.com/borneo ethnic cafe (B.E).