Friday, October 23

Enda amat, ku SWP

0

SWP enda ngerampas raban parti bukai

KUCHING: Parti Pekerja Sarawak (SWP) nyangkal tuduh ti madah parti nya ngerampas raban parti bukai munyika bisi diriput dalam sebengkah surat kabar jaku English kemari.

Mandal Presiden Kanan parti Josephine Randan Mawat madahka mayuh bukti tiga iku orang ari Parti Demokratik Progresif Sarawak (SPDP) Pakan minta nyereta parti nya.

Kad nyadi raban parti di­pansutka sepengudah ketetiga iku nya ngisi pom ari parti.

“SWP enda ngerampas ra­ban ari parti bukai. Sigi amat SWP diatu benung ransing ngerijister raban baru tang ukai reti iya kami ngerampas raban parti bukai. Baka parti politik ke bukai, SWP deka nerima sapa aja ke deka nyadi raban dalam parti.

“Senentang kes tu, mayuh bukti mandangka sida tiga bisi minta masuk SWP. Aku deka nerangka ditu ke alai SWP semina ngeluarka kad nyadi raban ngagai orang ti udah ngisi pom peminta,”ku iya ba siti aum pengarang berita di opis SWP kemari.

Josephine nambah, SWP enda mansik enggau silik sekalika orang ke minta nyadi raban dalam SWP nya kala nyereta parti politik bukai tauka enda.

Hari Minggu ke udah, surat kabar dalam jaku English ngeriput mayuh raban SPDP enda lantang ati enggau pen­gawa SWP ti mansutka kad ra­ban ngagai sekeda raban orang ke agi dalam parti SPDP.

Tuai Indu SPDP Pakan Patimah Bllaka entara orang ke bisi nerima kad raban SWP alai iya madah kediri tekenyit nerima kad nya ketegal ti enda kala minta masuk parti baru nya.