Iya madah peneleba Hari Gawai Dayak ulih matak temuai laban menua bukai enda tetundaka produk sebaka enggau enggi kitai
SANTUBONG:Hari Gawai Dayak ulih nyadi produk industri dagang temuai ke ulih narit mayuh temuai ngagai menua tu, laban hari besai baka tu lain ari pengerami hari besai bukai.
Direktor Opis Menteri Dagang Temuai Malaysia (TM) Ahmad Johanif madah pemerat ngangkatka Gawai Dayak Iya madah, berindik ari nya, antara pengawa TM, belabuh ari taun nyin tadi, begulai enggau Kampung Budaya Sarawak (SCV) ngaga pakej Gawai laban SCV endang tebilang enggau nama ‘The Living Museum’.
“Chara kami ngaga promosyen ari sukut adat enggau Gawai nya empu. Kami ngambi penegap Gawai ke ulih narit orang mayuh. Kami ngasuh sida iya ngasaika peneleba Hari Gawai diau di rumah panjai.
“Mayuh orang nanya, enti maya Hari Gawai, nama utai ke manah ba pengerami nya. Enti nitihka jaku kitai, Hari Gawai tu sebaka enggau hari besai bukai baka Hari Raya, Taun Baru China…Tang kitai beratika Hari Gawai tu ari sukut ke lain ari ke bukai,” ku iya.
Iya bejaku munyi tu lebuh dikerandau pemberita beserimbai enggau atur pengawa ‘Farewell Golf Tournament’ ke iya empu ti diatur ulih Opis Sarawak Tourism Board (STB) enggau pemesai bukai di Damai Golf and Country Club semak ditu, kemari.
Iya madah pakej Gawai belabuh ari taun nyin tadi digaga panjai ngagai sebulan, ngambika orang mayuh ulih ngaga perambu peremisi ukai semina temuai antarabansa tang mega temuai ari menua tu empu.
“Endang mayuh orang enda nemu nama reti Gawai, semina nemu mimit aja, tang enda silik. Semina ke ditemu sida hari besai pupu bansa Dayak tang enda nemu bakani ku gaya orang nyambut Hari Gawai,” ku iya.
Nya alai ku iya, STB ti sigi ngemeratka konsep Adat, (Adventure) enggau Rampa Menua (CAN), madahka Sarawak bisi peluang ke besai dalam industri dagang temuai menua tu ngangkatka pengerami Gawai Dayak.
Kelimpah ari nya mega, Ahmad madah trend industri dagang temuai diatu enda sebaka enggau ke suba laban temuai diatu begunaka produk ke ulih meri sida iya peneleba.
“Reti nya, sida iya deka ngasaika peneleba nya enggau kitai. Enti suba, nyangka sida semina meda aja tang diatu, sida iya pen deka ngasaika peneleba nya,” ku iya lalu nambah program Nyemilik ke bekait enggau peneleba tu bejalai enggau manah laban temuai dibai diau begulai enggau orang ditu lalu ngasaika pendiau raban bansa menua tu.
Iya madah peneleba baka tu ulih narit temuai laban menua bukai enda ulih nunda produk baka tu.
“Orang ke besemekih enggau kitai dalam industri enda ulih nunda produk kitai laban enti kitai bechuntoka bansa Iban, semina bisi di Sarawak aja. Enti bechuntoka menua Thailand enda ulih nunda produk kitai laban sida nadai bansa Iban ke diau dia..Nya pengering dikembuan kitai,” ku iya.
Kelimpah ari nya mega, iya madah antara produk bukai industri dagang temuai menua tu ulih mega ngangkatka peneleba ngena ‘Penambang’.
“Di Sarawak aja bisi penambang. Enda ngawa enti semina seminit dua aja ke ngena penambang ke seberai, laban nya peneleba.
“Baka (Travel Agent) di menua tu patut nemu pegap produk menua ke ulih diangkatka, patut bisi elemen ‘monopoli’ ke nyadi sebengkah ari pakej ke ulih ditunda orang bukai,” ku iya ke mega madahka produk Kek Lapis, Terubuk Masin sigi udah tebilang.
Iya madah suba, tikai Sarawak chukup tebilang endar tang trend nya diatu nyau kurang.
“Kadang-kadang pakej tauka produk ke dijual kitai aruh nyengkaum barang ke muntang dibai pulai. Baka tikai Sarawak, iya besai sereta tusah dibai ,” ku iya.
Dalam perambu Perintah Menua deka ngangkatka industri dagang temuai, Sarawak agi mayuh sumber ke ulih ngangkatka menua tu.
“Deka mujur ngemansangka pengawa dagang temuai, arapka produk kitai sereta arapka barang ke ulih dijual kita, kena ngangkatka ekonomi menua sereta diri empu,” ku iya.