SARATOK: Urung 200 iku peranak Rumah Andau, Sungai Bangkong Kabo, Saratok berasai lantang endar seput sepengudah projek ngemanahka jematan meraka Sungai Bangkong Kabo udah tembu digaga nitihka timpuh ti udah ditetapka.
Jematan ke beungkus RM100,000 nya nyadi jalai penyambung pansut sereta penama peranak rumah panjai nya.
Kaban Parlimen Saratok Jelaing Mersat madahka, nya meh kelai perintah nadai kala enda ngemeratka tanggungpengawa sida ngagai rayat.
“Taja pan ketuai enggau perintah Barisan Nasional (BN) suah dituduh sereta dikemaruhka penyakal enggau sekeda pekara, tang semua nya enda ngelemika semengatka kami terus gawa ke rayat.
“Gelumbang transformasyen ti dipejalaika perintah diatu ngemeratka pengawa nyikap perengkaguna ba menua pesisir.
“Taja pia, semua tu enda ulih dipejalaika enggau mujur enti sema rayat enda sukung ngagai pekara nya,” pia ku iya bejaku ba Pengerami Bejadika Jematan di Rumah Andau, Sungai Bangkong Kabo, Saratok ensanus.
Jematan nya nyadi jalai ke ditengah peranak menua sereta bala nembiak pulai mansang ngagai Sekula Primari (SK) Sungai Bangkong ba seberai sungai, nurun ke pasar Saratok sereta mega kebun sida.
Ku Jelaing rayat ulih meda pemujur ke mai menua Malaysia nuju pemansang ti ngemegahka ati asil ari iring sereta pengawa ti dipejalaika Menteri Besai kena nentuka menua tu nyapai status menua maju nyerumba taun 2020.
“Rayat ba menua tu mega patut terus meri sukung ke penuh ngagai perintah BN ngambika sida ulih ngemujurka agenda pemansang nya belama.
“Sukung ke tegap ari rayat ngelama tu enggau ke dudi ila deka nyadika pelasar pemansang kitai semua,” pia ku Sapit Menteri Perengka Pengangkut nya.
Bela bisi ngulu pengerami nya Kaban Kunsil Besai Parti Demokratik Progresif Sarawak (SPDP) Chambai Lindong enggau sekretari Kaban Parlimen Saratok Desmond Reynold Jemeni, bala ketuai raban bansa enggau peranak menua nya.