Rayat menua pesisir dilalau bejejimat enggau orang ke bejalaika aktiviti bejual terus lebih agi maya musin pengerami baka ke diatu
KUCHING: Rayat menua pesisir dilalau bejejaga dikena ngenukuka pengamat sesebengkah sekim tauka aktiviti bejual terus ti dipejalaika sesebengkah kompeni kena nyeliahka diri ari kena tipu.
Direktor Opis Dagang Dalam Nengeri, Koperasi enggau Pekara Bebelika Barang (PPDNKK) Wan Ahmad Uzir Wan Sulaiman madah, kompeni ti bejalaika aktiviti bejual terus patut direjister sereta nitihka atur ke udah diberi penetap.
Iya madahka, diatu kompeni aktiviti bejual terus ukai semina bejalaika pengawa sida di mengeri aja tang mega udah dikerembaika ngagai menua pesisir.
Orang mayuh patut nuku ke dulu pengamat sesebuah kompeni sekalika udah bisi direjister tauka bedau enggau SSM (Suruhanjaya Syarikat Malaysia) enti nyema sida madahka diri nya kompeni bejual terus, nengah laman web www.kpdnkk.gov.my tauka arus Jualan Langsung 1 300-888-255 sereta ulih meda rintai barang ti udah diberi lisin, ku iya.
“Kitai ti nyadi orang penguna bebelika barang aruh pandai agi ari sida kompeni bejual terus.
“Lebih agi diatu sida udah nemu nyaran peranak menua pesisir. Nya kebuah aku meri jaku lalau anang kelalu mudah teparuk nangika ke kena tipu sida ke bejalaika pengawa bejual terus.
“Ke patut kitai minta nyerenih lisin sida lalu ngenukuka pengamat nya enggau KPDNKK (Opis Menteri Dagang Dalam Nengeri, Koperasi enggau Pekara Bebelika Barang),” ku iya mega seraya ngelalau orang mayuh ngambika enda arapka pengawa Kerawis enggau Menang.
Uzir mansutka pekara nya maya baum enggau pengarang berita Program Bejual pulai ke Sekolah, Kimpin Nurun Rega Barang, enggau Sekim Nyaga Rega Musin Pengerami Krismas, ti diatur PPDNKK ba Boulevard Hypermarket Kuching, ditu kemari.
Ngenang pekara nya baru iya madahka SSM ke dibaruh pegai KPDNKK nadai ngeluarka lisin Kerawis enggau Menang.
“Ngirauka kitai diatu kompeni ngena lisin bejual terus dikena bejalaika Kerawis enggau Menang.
Dulu ari nya iya ngenang KPDNKK bisi nerima penatai 10 iku orang ti kena tipu kompeni Dynamik Wira Marketing, bekaul enggau sekim beras 1Malaysia.
Asil ari pansik pemesai KPDNKK, kompeni nya enda direjister nengah SSM lalu nya sebengkah kes nipu sereta diatu dibaruh kes polis, ku iya.
Nitihku iya lebih 10 iku sida ke datai bedawaka kena tipu urung RM2 juta, seseiku orang ti bekaul enggau pekara tu ke diau ba genturung pendiau ke sama sereta udah ditangkap polis.
Dalam sebengkah ripot surat kabar, Dynamic Wira Marketing Sdn Bhd ngatur sekim pelabur beras belalai mungkur mensia mayuh Kampung Menjau Batu 21, ditu berengkah bulan Mei ngena chara belalai.