Anang ngambi jalai muntang ensuruk baruh jematan: Lo

0

PADAWAN: Mensia mayuh ti diau besemak enggau pasar Siburan diperansang ngena jematan di baru udah tembu digaga maya meraka jalai besai ngambika tau nentuka pengelikun diri sereta orang bukai ti betengahka jalai alun.

Chairman Kunsil Kandang Padawan (MPP) Lo Khere Chiang madahka jematan baru ke beungkus RM300,000 ti digaga nganti jematan lama ti rusak ketegal ditempuh lori besai bedau lama tu tadi mega deka nentuka pengelikun nembiak ti besekula enda jauh ari jalai besai.

“Kitai minta kerejasama mensia mayuh nyengkaum bala apai indai nembiak ti nganjung anak sida iya besekula ngena jematan tu maya meraka jalai.

“Chara tu ulih mantu kitai ngurangka pemayuh kes bebadi ti suah nyadi di jalai ditu,” ku iya bejaku ngagai pemberita maya meresa jematan nya di Siburan, kemari.

Taja pan MPP nadai kuasa ngukum orang ti enda nengah jematan maya meraka jalai, Lo minta mensia mayuh bela meretika guna ngintu pengelikun diri ngambika orang bukai ti bela bekenaka jalai besai nya likun magang.

“Naka ke diatu kitai (MPP) nadai kuasa ngukum orang ti ngambi jalai muntang meraka jalai ari baruh jematan…kitai minta sida iya berundingka pengelikun semua orang ke alai polis ngembuan kuasa ngukum barang orang ti enda ninga tesau tu,” ku iya nambah.

Pengawa ngaga jematan ti berengkah dalam bulan Julai 2012 dikemata Opis Kereja Raya (JKR) begulai enggau kontrektor ti udah dipilih lalu tembu dalam timpuh empat bulan iya nya kenaka 5 Disember 2012.

Jematan nya digaga sepeninggi 6 meter sereta 40 meter pemanjai ti meri pengelantang ngagai nembiak sekula meraka jalai ari pasar Siburan nuju ngagai sekula China ti besemak.

Ba kaul ke bukai, Lo ngansak ijinsi tauka kompeni enda sengapa ngitang poster enggau tuju ngelakuka servis sida iya ke alai pengawa tu patut minta pemendar ari opis MPP dulu baka ke bisi dipeda ba jematan ke baru udah tembu digaga nya.

“Poster ti digitang enggau nadai pemendar deka dibuka raban pengereja pengawa MPP.

“Orang ke ngempu poster tu patut minta pemendar ari opis MPP ke alai kitai deka beratika gaya poster sida iya nya sebedau meri pemendar digitang,” ku iya.

Bela datai Injineer Pelilih JKR, Awang Mohd Fadillah, raban kontrektor enggau konsultan sereta raban  pengereja pengawa MPP ke bukai.