Sunday, March 24

Aktiviti dipejalai ba Gua Niah ngirauka ati rayat

0

NITIHKA UNDANG-UNDANG?: Mensia mayuh selibuh lalu minta pekara tu diterang bekaul penyadi di Gua Niah.

LIM

MIRI: Mensia mayuh ngenataika pengirau ati sida bekaul enggau aktiviti ke nyadi ba Gua Niah ti tau ngerusak pemanah rampa menua di nengeri tu.

Chairman Indu DAP Senadin, Lim Su Kien minta opis bekuasa datai lalu nerang isu bekaul sekeda endur di Gua Niah ke bisi kena keruga ungkup guna dagang.

Lim madahka, iya nerima cherita ari mensia mayuh ke beselibuh enggau gua nya lalu minta pekara nya diterang laban pekara tu mungkur pengelikun mensia mayuh.

“Kandang endur ke kena keruga nya enda ulih dipeda ari jalai besai, tang orang aruh tama jauh ke dalam gua enti deka meda utai ke nyadi nya.

“Ari gambar, aku pechaya sekeda bagi gua nya udah kena keruga ungkup tuju komersil,” ku iya lebuh dikerandau pemberita ba aum media opis DAP Senadin ditu ensana.

Ku Lim, Gua Niah dibuka ngagai mensia mayuh tang bisi sekeda endur nya dijaga lalu enda tau dipasuk sebarang.

“Sapa meh nemu enti sema bisi orang masuk enda beradat ngagai endur nya? Kitai enda nemu, nya alai kami minta opis ke bekaul meresa utai tu nyema cherita tu amat,” ku tambah iya.

Iya mega ngansak opis bekuasa ngelempai atur ke berat enti sema aktiviti ke bisi dipejalai nya endang ngelanggar undang-undang.