PALAN ENDA LIKUN: Tangga nuju palan Gerempung Komuniti Taman Kenyalang siti ari endur ke ditaga raban pengeruntun bejalaika pengawa jai sida.
LAWU: Kho mandangka lengan enggau kaki iya ke bakal tegal kena runtun.
KUCHING: Seraban indu tuai ke diau di Kenyalang Taman udah besebanaka raban pengeruntun ke kala beambi ulih ba sekeda sida maya sida pansut bebelika barang ba makit tumu-tumu pagi.
Sida bedawaka pengeruntun belabuh bejalaika pengawa jai nya urung pukul 6 ngagai 7 pagi laban maya nya benung nadai mayuh orang.
Siti alan ke suah alai sida nya tangga nuju palan Gerempung Komuniti Taman Kenyalang ke jalai mintas suah dikena sida ngagai pasar basah enggau rangkai; palan paking semak dia enggau sekeda endur ba Pusat Dagang Kenyalang.
Seiku indu tuai benama Kho nyadi orang ke dituntung penusah nya kena Hari Minggu tu tadi (30 Dis) bekunsi berita enggau pemberita The Borneo Post kemari. Kho nyebut orang nya tinggi sereta burak.
“Penusah nya nyadi urung pukul 7.15 pagi lebuh aku enggau bakih aku Ng, ke mega tuai, bejalai nuju tangga ngagai palan Gerempung Komuniti Taman Kenyalang laban deka ngagai makit. Tu meh maya kami meda lelaki seiku tinggi sereta burak gamal ngena topi tabi ngena baju getah kengkang biru burak megai gupung bungai ba tangga.
“Iya nyelai gamal meda kami. Tegal gamal baka orang ke enda menyana, nya kebuah kami enda ibuh ke iya. Maya kami mansa iya, iya jejampat ngeruntun lumpit aku.
“Aku betan ba lumpit seraya nyerauh tang nadai orang mantu. Iya ngeju aku ke tanah lalu ngerampas lumpit aku,” ku Kho ke bakal ba lengan kanan enggau siku mega kaki kanan laban ke kena ju lalu rebah.
LAWU: Kho mandangka lengan enggau kaki iya ke bakal tegal kena runtun.
Bakih iya, Ng, enda nemu nama patut digaga agi tang bela rerauh ngambika penchuri nya ngelepaska lumpit bakih iya.
Taja pan pia, iya beterimakasihka penchuri nya enda bebaika senyata tajam baka lungga enti enda pia pedis agi sida iya.
Iya madahka peneleba diri bisi ngerandau bala indu ke bukai ke diau ba pengentap pendiau ke sama, sida beratika 10 iku indu udah kena runtun lelaki ke sama enggau seiku agi ke disebut sida pandak sereta burak gamal.
Dikena mutarka penanggul polis patut ngaga diri nyadi orang periman nya baru ulih nangkap sida tu.
Seiku agi peranak dia, Felix Chew, merambu polis matau kandang menua Kenyalang Park enggau kandang makit nya maya tumu pagi.
“Kami arap enti tu dipejalaika, kami deka ngasaika diri likun agi seraya pengawa beruntunka lumpit nya deka ngetu. Kami enggai meda mensia mayuh kelebih agi indu tuai ngasaika penusah baka nya,” ku iya.