Raban PBTM diansak regas ba pengawa dagang kena nyungkak ekonomi diri enggau ruang bilik
KOTA SAMARAHAN: Orang ti pinchin soldadu ke nyadi kaban Gerempung Ex-Soldadu Malaysia (PBTM) Pampang Kota Samarahan patut landik ngerebut peluang dalam pengawa dagang kena ngemansangka diri empu.
Kaban Kunsil Nengeri (ADUN) Sadong Jaya Aidel Lariwoo madahka pengawa dagang sebengkah bidang engkeman ke nyadi penyungkak ekonomi diri enggau ruang bilik.
Bebendar iya madahka mayuh peluang ke ulih dipasuk bepelasarka pengelandik sida nyengkaum bantu ari perintah.
“Perintah seruran meri peransang sereta ngansak rayat nengeri tu nyengkaum orang ti pinchin soldadu masuk pengawa dagang ti ulih ngenyungkakka ekonomi.
“Aku ngarapka orang ti pinchin soldadu landik ngerebut peluang ti udah disediaka nya,” ku iya lebuh bejaku ba pengerami makai malam nyerumba ngintu PBTM Pampang Kota Samarahan ti Ke-26 ba Dewan Suarah ditu, bedau lama ke udah.
Iya ngarika Sapit Menteri Dagang Dalam Nengeri, Gerempung Kerejsama enggau Pekara Bebelika Barang Datuk Rohani Abdul Karim ba pengerami nya.
Bejaku baru iya madahka perintah enda kala ngelaungka pengelantang raban soldadu,baka nambahka pinchin soldadu ari 2.5 persin ngagai 8 persin dalam Bajet 2013.
“Nya gelar enggau basa perintah ngagai orang ti kala nyadi soldadu ke gawa ngetanka menua,” ku iya.
Ba pengerami nya iya madahka Rohani ngungkupka RM3,000 sereta RM5,000 ari ADUN Muara Tuang Dato Sri Mohammad Ali Mahmud enggau ADUN Asajaya Abdul Karim Rahman Hamzah, ngambika bisi dikena PBTM Pampang Kota Samarahan bejalaika aktiviti.
Nyerumba pengerami nya pengawa nyuaka Pingat Jasa Malaysia (PJM) ngagai 30 iku bakan PBTM Pampang Kota Samarahan, nyuaka bantu pengelantang sereta nyuaka laptop 1Malaysia sereta pengawa bukai bisi diatur.
Bela datai ba pengerami nya Ketuai Pampang PBTM Kapten (B) Hadzli Awi.