Sebengkah penguntung kena mantu kaban parti ke dituntung penusahKUCHING: Sekim insuran ke ditawar Parti Pekereja Sarawak (SWP) ngagai raban parti iya nya ukai sebengkah pengawa melitik, ku kaban Suprem Kunsil Andy Lawrence.
Iya nerangka sekim insuran nya sebengkah ari program ke dipejalaika parti mantu raban sida kelebih agi maya ke kena tuntung penusah.
“Orang ke suah nyakal kami, kelebih agi nengah Radio Free Sarawak (RFS), iya nya sekim insuran nya sebengkah chara melitik ngambika narit orang masuk nyadi kaban parti.
“Naka ke diatu, 10 iku raban parti udah nerima pampas insuran ngarika sida sebilik. Pekara ke dipeguna nya orang ke nuntut pampas nya semina meri bukti orang ke nadai nya seiku ari raban parti, ke disempulang enggau surat pemati,” ku iya dalam sebengkah penerang ensana.
SWP, ke ditumbuh taun tu nya sebengkah parti ti keterubah nyendiaka bungkur insuran bebadi ngagai kaban parti.Tang taja pia bisi orang madahka sekim insuran tu semina umpan ngambika orang masuk nyadi kaban.
Andy, ke dipelaba deka bediri ngena tikit parti nya di Sri Aman ba pengawa bepilih ti deka datai tu ila, madah barang sapa orang ke agi gegama bekaul enggau sekim insuran ke ditawar nya tau datai lalu ngelawa opis ke besemak kompeni bempu insurans nya, Mulipurpose.
“Kami nadai pekara ke dipelalai,” ku iya.
Iya madahka SWP mai polisi enda melitik mensia mayuh, lalu deka ngayanka ngagai orang ke nyakal, kami enda deka beambi ulih ke sukung dikena nguntung diri empu.
Ba pengawa bepilih ti deka datai, SWP ngayanka diri bakih enggau Barisan Nasional (BN) tang deka bediri di enam sitak parlimen ke dipegai Parti Rayat Sarawak (PRS).