Bakun enggau Batang Ai chukup, Sarawak enda begunaka tekat ai baru, ku Anwar
KUCHING: Pakatan Rakyat (PR) deka ngelaban sebarang pengawa begagaka tekat ai ke bukai jemah ila lalu nya nyengkaum perambu ngaga sebuah di Baram.Bejaku ngagai pemberita ditu kemari, Ketuai PR Datuk Seri Anwar Ibrahim madah, Sarawak udah ngembuan chukup tekat ai ti ulih ngemansutka kuasa karan ke besai lalu enda begunaka tekat ai ke baru.
“Kuasa karan ti dipansutka tekat ai di Sarawak nyengkaum Batang Ai enggau Bakun ulih nyangkung pinta ba serata nengeri sereta ulih mega nyangkung setengah ari menua semenanjung.
“Ketegal mayuh pekara enda diintu enggau manah ke nyengkaum pemaik rayat maya begagaka tekat ai ke dulu suba, PR netapka pemutus deka ngelaban sebarang pengawa begagaka tekat ai ke baru,” ku iya.
Taja pia, tekat ai ke udah tauka benung digaga baka ke di Murum deka dikemendar dipajak, tandu iya.
Anwar ke mega penyanding penemu Parti Keadilan Rakyat (PKR) madah, mayuh pekara patut diperunding enti deka begaga tekat ai lalu baka ke udah pemaik enggau pengelantang rayat aruh dikemerat, rumah sereta tanah ke kena bungkur projek patut diintu enggau manah.
“Kitai patut beratika atur mayar pampas ke patut lalu nya nyengkaum bayar pampas rumah, tanah, kayu, buah sereta pemakai bukai baka jelu enggau ikan di sungai.
“Baka ke udah, ari peneleba ke dulu, perintah udah enda ngeamatka semaya ti deka mayar pampas nitihka patut ke alai pemaik enggau pengelantang bukai pan enda dikemerat,” ku iya.
Sepengudah aum pengarang berita nya kemari, Anwar bisi nyuaka kad nyadi kaban ngagai Wilfred Landong ,56, Menijer Besai Opis Kampung Sarawak (SFC) ke dulu suba ti ngining deka ngarika PKR ba sitak parlimen Sri Aman ba pengawa bepilih besai ti deka datai tu ila.
Bela bisi ngulu aum pengarang berita nya, Chairman PKR Sarawak Baru Bian enggau ADUN PKR Krian Ali Biju.