KUCHING: Perintah enda ulih nagang seraban orang begulai enggau peranak menua mantah bebala mayuh berengkah ari 16 ngagai 20 Januari tu tanda ngenggaika pengawa ngaga tekat hidroelekterik Baram.
Menteri Kanan Tan Sri Dr James Jemut Masing madah, peranak menua tauka rayat bisi hak mandangka pengenggai tauka pengeringat tang pengawa ke diatur nya patut likun sereta belalauka undang-undang.
“Nya hak sida (raban nya). Kitai enda ulih nagang sida, semina lalau aku ngagai sida, anang melakangka undang-undang sereta sida tu patut ngemeratka pengelikun mensia mayuh,” ku iya lebuh dikerandau.
Masing ke mega Menteri Pemansang Tanah sereta Presiden Parti Rayat Sarawak (PRS) madah, rayat tau mantah enti ngasaika enda puas ati tang uji perunding ulah sida nya sekalika nguntung tauka enda, nya pekara bukai.
“Sida ari genturung pendiau dia mega peneka enti bisi ati ngulu pengawa nya. Sida bisi pemutus diri, kitai enda nagang sida,” tandu iya.
Iya nyebut munyi nya lebuh dipinta nimbal penerang ba sebengkah media ke ngenang atur pengawa ‘konvoi perau panjai’ bepun ari Lio Mato (Hulu Baram) nuju pasar Long Lama dikena ngayanka pengeringat projek ngaga tekat hidroelekterik Baram.
Peranak menua dia mega diperansang ngulu konvoi nya. Sepenyangkai sida di Long Lama perau nya ditusun berintai nebing Batang Baram.
Pengawa mantah bebala mayuh nya berengkah ari Lio Mato kena 16 Januari nyentuk ke Long Lama kena 20 Januari 2013.
Perintah menua Sarawak merambu ngaga tekat hidroelekterik Baram ngambika sebengkah bandar baru betumbuh dia sereta ulih nyungkak ekonomi kandang menua ngelingi nya.
Kepala Menteri Pehin Sri Abdul Taib Mahmud kena bulan Ogos taun nyin suba madah ngagai media, kandang menua ke baka dia beguna amatka pemansang ke ulih matak ekonomi.
Iya mega madah, enti pemansang enda dibai ngagai kandang menua nya, dia penyampau mensia deka majak kusut laban nembiak baru rindu agi mindag ngagai mengeri.
Ntithka penerang iya, tekat nya ulih ngeluarka urung 1,000 megawatt enti tembu amat.
Tandu iya, pansik ke silik pasal pengawa ngaga tekat hidroelekterik Baram deka dipejalaika taun tu.