SIBU: Direktor Sukarelawan Malaysia (RELA) Sarawak Brigadier Jeneral (RELA) Rini Tupong madahka, RELA ukai menalan alai ngaga sekim jampat kaya.
Tang ku iya, RELA bekenaka raban ti ngembuan ati lurus meri servis bejalaika tanggungpengawa ngintu pengelikun mensia mayuh.
Ku iya, sekeda ari batang pengawa RELA iya nya ngintu pengelikun baka raban polis kelimpah ari ngembuan pengeransing megai tanggungpengawa lalu ukai bekenaka kuasa RELA ngereja penyalah.
“RELA ukai baka sekim jampat kaya baka nyual produk raban tu baka baju uniform ngagai bala raban ke bukai. RELA ukai alai bedagang tang ngemeratka pengelikun mensia mayuh.
“Kitai bisi tetemuka beberapa iku ketuai unit RELA nyual uniform RELA lalu ngulihka penguntung ngagai diri empu. Kitai enggai bala raban majakka penyalah baka tu dudi hari ila,” ku iya maya bejaku ba Pengerami Makai Lemai nyerumba ngintu taun baru ke diatur Palan Operasi RELA Sibu ditu, malam ensana.
Ku iya, uniform RELA diberi ngagai raban enggau chara enda bebayar.
“Kitai deka ngelabuhka ukum ngagai sapa ti bisi ngelanggar atur tu,” ku iya madahka baru.
Ba pengawa nya mega, Rini ngelalau bala kaban RELA ngambika lebih agi ngemeratka menua tu ari diri empu.
“Nya alai, kitai ngambi raban baru ari sida ti endang deka bejalaika tanggungpengawa ngagai menua enggau pemansang mensia mayuh,” ku iya.
Iya muji Palan Operasi Sibu laban udah mayuh meri servis ngagai mensia mayuh kelimpah ari ngintu pengelikun sida.
“Aku gaga bendar ati laban semua gerempung RELA ba Sarawak ditu ulih bejalaika pengawa enggau manah,” ku iya.
Berebak enggau tu mega, ku Rini naka kediatu, udah bisi 27 iti palan operasi RELA udah direjister.
Tang ku iya, bisi mega raban RELA ngagai raban diri empu ti enda ngena palan operasi tu direjister.
Iya ngarapka raban tu ulih ngerijister palan operasi sida ngambika ulih bejalaika tanggungpengawa enggau badas agi.
Pengerami ti digulu urung 100 iku tu mega bisi digulu Ketuai Palan Operasi RELA Sibu Wong Ling Tong.