MIRI: Perintah menua nengah Opis Tanah enggau Survei enda deka mujur mutarka penanggul berumah enggau nadai pemendar ba kandang mengeri.
Superitendan Opis Tanah enggau Survei Pelilih Miri, Unus Tambi madahka bandaraya Miri ngembuan raban orang ti ngentakka rumah enggau nadai pemendar ti pemadu mayuh enti dibanding enggau pelilih menua bukai.
“Nitih rikod kami ke pemadu baru,bisi urung 50 iku ti ngentakka rumah enggau nadai pemendar ba kandang bandaraya Miri,” iya bejaku munyi tu lebuh nyuaka ‘communal reserve certificate’ ngagai Genturung Pendiau Sungai Dalam A enggau B ba Opis Tanah enggau Survei Miri apin lama ke udah.
Ku Unus, penanggul ngentak rumah enggau nadai pemendar ba bandaraya nya nyadi bepun ari pemayuh penyampau peranak menua pesisir ke mindah ke mengeri.
Ku iya, perintah nengah ‘in-situ approach’ ari baruh Seksyen 7, kena mutarka pekara nya enggau manah.
Chara nya ditunda berindik ari pengawa perintah ngemajak Polisi Sekim Berumah Baru (SPS) pengudah Atur Pemansang Malaysia Lumpar Ke-7 suba.
Ku iya, polisi nya diketuka suba laban raban opis perintah baka Housing Development Corporation (HDC) enggau pemaju kompeni bisi ngaga rumah kos murah.
Ku iya, Nengah ‘in-situ approach’, perintah udah mujur mutarka penanggul ngentakka rumah enggau nadai pemendar ba 11 palan di enam buah Bagi menua di Sarawak taun nyin kemari.
Palan nya nyengkaum Genturung Pendiau Melayu Engkilili (Sri Aman), Sg.Pakan Loba Kerto enggau Batu 7 ½ Jln Oya Lama sereta Batu 21 Jln Tangi Spur, Ulu Oya Sibu, Genturung Pendiau Muhibbah (Sarikei), Genturung Pendiau Hikmah, Lot 81, Sebangan T.D Sebuyau enggau Pasar Sebangan, Sebuyau (Samarahan), Sg. Benang enggau Sg. Endut, Kabong (Betong) sereta Genturung Pendiau Sungai Dalam, Batu 6, Lambir (Miri).
Taja pia, perintah ukai semina meri status communal reserve ngagai palan nya, laban bisi atur ke enda tau enda dipejalaika opis nya nyengkaum mansik sereta nukuka palan nya amat tau diaku status nya.
Enti sema setipikit nya udah disuaka, perintah meri kandang menua nya perengkaguna baka ai paip ke beresi, karan enggau sekeda utai bukai.