Tuesday, November 12

Peranak Ulu Skrang nyidaka penerang Semejie

0

IDUP BN: Penyukung Barisan Nasional ari Ulu Skrang mandangka kaul ti tegap, sedia gawaka pengari BN maya PRU13 tu ila.

LUBOK ANTU: Peranak menua Ulu Skrang ba pelilih mit Engkilili enda lantang ati ninga penerang ari sapit chairman Parti Pekereja Sarawak (SWP) pampang Engkilili Semijie anak Janting ke balat ngemesaika presiden parti nya Larry Sng sereta benadaika orang menua ke pandai ngarika sitak parlimen Lubok Antu.

Kunsilor Robert anak Angga ke ngarika peranak menua nya madah, rayat Ulu Skrang balat nyima ke penerang ari Semejie ti udu ngemesaika Larry sereta ngemaluka orang Lubok Antu, baka ke nadai pandai ari nya.

Enti amat Larry nya manah nyadi ketuai sereta pengari rayat, nama kebuah anak lelaki Dato Sng Chee Hua nya enda diasuh bediri ba temat iya ada baka Kapit, kapa ke Lubok Antu?,” ku Robert.

“Iya tau minta pilih ba sitak ke mayuh bansa China. Kami ukai bepilih bansa tang dekaka bansa diri ngarika kami ba sitak Lubok Antu.

“Kami ngasaika Semejie udu ngemaruhka bansa diri nengah chara iya ngemesaika Larry. Nyangka iya bisi penguntung bukai, ari gaya iya bejaku,” ku iya lebuh nyerita ngagai Utusan Borneo ditu, kemari.

Nitih penemu Robert ke mega orang tegap Parti Pesaka Bumiputera Bersatu (PBB) pampang Engkilili, peranak Ulu Skrang ke nguan menua ulu agi begunaka pemansang ke dibai perintah Barisan Nasional (BN). Ari nya sida tetap nyukung pengari BN maya pengawa bepilih tu ila.

Kaban parlimen Lubok Antu, Nyalau begulai enggau kaban kunsil nengeri (ADUN) Engkilili Dr Johnical Rayong dah mandangka penyakah ngatur pengawa pemansang lalu diatu nyata jalai nuju Ulu Skrang benung digaga.

“Kami enda ulih dikemeli Semejie pia mega enggai bedagangka bansa diri ketegal sekeda penguntung,” tandu iya.

Bepun ari penyampau pengundi ke 90 persin bansa Iban, Lubok Antu mega aruh diarika bansa Iban.

“Ari nya, kami bisi pengari rayat ari menua diri baka Nyalau enggau Dr Rayong sereta ADUN Batang Ai Malcom Mussen Lamoh ngarika kami ditu.

“Kami ditu enda begunaka Larry, ari nya kami deka ngelungkupka iya dia ila,” ku iya.

Lebuh ngenang penerang ari SWP ke madahka parti nya udah ngerejister 8,000 iku kaban, nya penemu ngerambang aja, ku iya.

Robert madah, peranak Ulu Skrang nyengkaum pelilih mit Engkilili nemu sapa orang ke benama Semejie ke udah balat alah ngelaban Dr Rayong sereta lenyau duit jengkeram maya pengawa bepilih nengeri (PRN) taun 2011 suba.

Maya PRN Sarawak  2011 nya suba, Dr Rayong teulihka 4,928 undi, Semijie ti ngarika SNAP bulih 393 undi lalu Marudi @ Barudi ak Mawang (PKR) 1,121 undi enggau Jimmy Simon Maja  (Bebas) bulih 414 undi.