KUCHING: Jalai Moyan Segah di Batu Kawa ti pemanjai 2.1 kilometer deka digaga baru ngena ungkus belanja urung RM2 miliun, dipelaba tembu ujung bulan April 2013.
Chairman Majlis Perbandaran Padawan (MPP), Lo Khere Chiang madah, sepenembu jalai nya deka meri penyamai ngagai mensia mayuh ti betengahka jalai nya ninting hari.
Iya madah, jalai sepemanjai 2.1 kilometer nya jai tauka mayuh lubang ketegal perengka pengangkut berat nengah jalai nya ti sururan sarat, baka perengka pengangkut berat ti mai tanah.
“Kitai deka ngemanahka Jalai Segah Moyan ti pemajai 2.1 kilometer ngena ungkus belanja urung RM2 miliun ari perintah besai, ti dipelaba deka tembu ujung bulan April tu.
“Penanggul nya berindik ari ngelama tu nadai atur entara ijinsi tang diatu kitai udah ngatur aum enggau opis ti bekaul nyengkaum Opis Kerita Darat (JPJ), polis bekaul pekara nya.
“MPP mayuh ngeluarka belanja dikena ngemanahka jalai ketegal perengka pengakut berat seruran sarat,” ku iya maya aum pengarang berita di Batu Kawa ditu, kemari.
Dipelabaka urung 1,000 iku mensia tauka 40 ngagai 50 ruang bilik ngena Jalai Segah Moyan, kelimpah ari sida ari genturung pendiau Singai.
Nitihka penerang Lo, jalai nya dibaruh jaga Opis Kerja Raya sereta dipejalaika konteriktor CMS.
Iya madahka CMS deka ngemanahka jalai nya ngena perengka ti lebih tegap, ngambika nakal agi ari ke udah.
Kandang menua nya ti dibaruh jaga MPP, Lo madah, kena mutarka penanggul mensia ti betengahka jalai nya sebengkah aum udah diatur begulai enggau konteriktor, JKR enggau opis bukai ti bekaul.
Lo ngarapka orang mayuh ulih mereti sereta meri kerejasama, laban proses ngemanahka jalai nya begunaka timpuh panjai.
“Dikena ngemanahka sesebangkah jalai kitai beguna sereta begigaka belanja, nya kebuah kitai ngambi timpuh panjai. Kitai ngarapka orang mayuh ulih mereti sereta meri kerejasama ngagai kami.
“Kitai ngarapka penanggul ti baka tu ulih dikurangka jemah ila, laban kitai suah udah ngatur aum enggau opis ti bekaul,” ku iya.
Bela bisi ngenataika didi ngulu aum pengarang berita nya kemari, Sapit Direktor Opis Kerja Raya (Pengurusan) Ir. Liew Jiu Ming enggau ke bukai.