Perintah ngemeratka pengelantang rayat

0

SRI AMAN: Perintah seruran ngemeratka pengelantang semua rayat nengah mayuh macham atur pemansang lebih agi ungkup peranak menua pesisir.

Sapit Menteri Dagang Dalam Menua, Gerempung Kerejasama enggau Pekara Bebeli Barang, Datuk Rohani Abdul Karim bejaku munyi nya maya pengerami Ketuai Begulai enggau Rayat ke diatur JASA Pelilih Sri Aman di Rumah Raweng Jalong, Nanga Entulang, Sri Aman empai lama ke udah.

“Semua nya ulih peda ari gaya pemansang ke udah diasai sereta benung dipejalai dalam atur pemansang perintah diungkup ngagai peranak menua pesisir baka ke diatu,” ku iya.

Dalam teks jaku ke dibacha pengari iya Norazlan Hasbullah maya pengawa nya, iya ngelalau peranak menua ngambika nyukung atur pemansang perintah awakka tau nguntungka semua sida.

“Enti nadai sukung ari rayat, kitai enda ulih ngemujurka atur pemansang nitihka perambu. Ari kaul ke manah entara rayat enggau perintah, semua penyamai sereta pengelantang ulih diasaika semua,” tandu iya.

Berebak enggau nya, iya mega meransang rayat ngambika seruran chakah ngemansangka diri lalu ukai semina ngarapka sabsidi tauka bantu ari perintah aja.

“Kitai meda jalai ke udah dirandang perintah nengah atur pemansang, semua nya begunaka pengelandik sereta pemandai ari semua. Rebut sebarang awak ke bisi ngelingi kitai, anang lembau besemekih enggau orang bukai,” tandu iya.

Kelimpah ari nya, iya ngelalau semua ngambika seruran muka runding sereta penemu dikena nyeliahka diri ari kena tinggal arus pemansang.

“Ba sesebengkah genturung pendiau, Komiti Pemansang enggau Pengelikun Genturung Pendiau (JKKK) patut chakah ngemeranka pengawa sida. Semua atur pemansang it dipejalaika perintah begunaka saup ari komiti tu,” ku iya.

“Ukai semina landik berunding, komiti tu mega patut pandai ngereja ngambika peranak menua ulih ngasaika penguntung ari pemansang ke dipejalaika perintah.

Bela bisi ngulu atur pengawa nya, Pemesai JASA sitak parlimen Batang Lupar, Zaidel Ripin, pemantu Datuk Rohani, Mohd Saperi Abdul Karim, sekretari Datuk Rohani Saifudin Matsah, sekretari Parti Pesaka Bumiputera Bersatu (PBB) N.23 Lingga, Nassir Johan, Pengulu Joseph Lichong, ketuai opis perintah sereta peranak menua ke ngelingi nya.