KUCHING: Majlis Bandaraya Kuching Selatan (MBKS) ngembuan juluk deka terus ngemanahka ‘delivering system’ awakka ulih tejapaika juluk nyadi opis loko otoriti (PBT) pemadu manah di Malaysia.
Nitih penerang ari Datuk Bandar MBKS James Chan, taja pan udah nerima macham gelar tauka perais ti nunjukka sistem servis ti manah sereta ngelui tikas ke patut, tang sida ngasaika nya bedau chukup.
gNama utai ti dipadahka manah suba engka enda ngemuaska ati orang seharitu lalu nama ke dikumbai jamapat suba tau nyadi lubah diatu.
gNya kebuah MBKS deka majak ngiga chara inovatif sereta belalauka penguna kena ngemenuhka mayuh macham guna rayat mengeri tu, temuai enggau pemeranak puku,” ku iya lebuh bejaku maya begempuru MBKS ditu, kemari.
MBKS udah nerima Anugerah Emas (Anugerah Alam Sekitar Ketua Menteri Sarawak 2011/2012) bulan Disember taun nyin tadi kena ngelar pemendar nyaga rampa menua.
Ba renggat antarabansa, MBKS nerima dua gelar laban ulih ngetanka pemeresi agu mensia mayuh ba pekara pengatur pengawa sereta pemanah pengawa dikereja Chan ngemansangka mengeri bepengerai renggat antarabansa.
Kelimpah ari nya, MBKS mega nerima tiga gelar bansa baka ‘Penghargaan PBT Prihatin’ ti beratka perengka guna mensia mayuh ungkup orang nyelai pendiau.
Nambahka nya MBKS nerima Anugerah Gangsa bagi ‘Kebersihan Tandas 1Malaysia Peringkat Kebangsaan enggau Anugerah Inisiatif Kawasan Kejiranan Hijau’ maya ‘Hari Perancangan Bandar Sedunia’.
Chan madah, iya temegah ati laban MBKS mujur ngaga inovasi enggau nipak diri kena ngemenuhka peminta ba ubah kemaya hari.
“Kitai patut meratika servis senetang perspektif penguna enggau ngemuaska ati orang ti nerima servis kitai,” ku iya.
Chan madah, taja pan pengereja pengawa MBKS mesti terus komited tang patut ngereja pengawa enda ibuh nganti diasuh.
gReti iya enti bisi ninga penanggul ti nyadi ba kandang endur dipegai MBKS, kita mesti mutarka pekara nya lalu enda ibuh nganti ketuai ngasuh, anang semina bepanggai ba kereja ti udah diasuh aja,” ku iya.
Berebak enggau nya mayuh macham gelar tauka perais diberi ngagai pengereja pengawa MBKS baka Anugerah Datuk Bandar diberi ngagai Lilian Liew, Anugerah Warga Kerja Prihatin diterima Wan Makhdar Wan Bujang, Anugerah Warga Kerja Berdedikasi (Naransamy Govinda Nair), Anugerah Inovasi (Robert Jackius) enggau Anugerah Kreativiti (Alison Lated).