Acryl: Atur baru ti ngemendarka OCPD ngeluarka penerang pengawa salah, ngemuntang pemberita

0

KUCHING: Berengkah ari taun 2013 pemberita ke ngarang penyadi pengawa salah di menua tu deka muntang sereta jampat ngulihka penerang bepun ari atur baru ti ngemendarka semua ket­uai polis pelilih menua (OCPD) nyaut tanya pasal pekara nya.

Kepala Polis Menua Datuk Acryl Sani Abdullah Sani madah bisi sekeda OCPD enggau ketuai opis polis tusah digiga enti sema pemberita deka ngulihka berita tauka timbal enggau jampat.

“Sekeda pemberita sebana tusah ngulihka berita tauka minta timbal ba sekeda kes, laban OCPD tauka ketuai opis tusah digiga.

“Nya alai, aku nyamin semua pemberita ke bisi ditu malam tu, taun 2013 kami (polis) deka bekerejasama enggau pember­ita, nyamin mensia mayuh deka nemu cherita ke bendar enti sema bisi penyarut ke nyadi di menua tu,” ku iya.

Iya madah baka tu ba atur pengawa lebuh nyamu raban pemberita di rumah iya, Casa Maxwell di Jalai Maxwell ditu, malam hari Tiga tu tadi.

Iya madah raban OCPD pa­tut nimbal sebarang tanya ari pemberita enggau manah lalu ukai mantaika pengeringat tauka nutup telefon laban ke enggai meri penerang.

“Kadang-kadang munyi pem­berita tu munyi ke ngansak laban deka ngulihka berita, lebuh maya OCPD benung kiruh (enti bisi kes diputar enggau jampat), nya baka ke enda manah.

“Tang taja pia, ngarapka semua OCPD ulih mutarka sebarang tanya baka tu enggau manah, laban kadang-kadang orang ke nerima timbal nya enda nyamai ati tang aku nemu semua raban pemberita menua tu ulih dibai bekerejasama.

“Ni alah pemberita nyau betelefon ngagai aku nanya sekeda kes, kebuah aku ngasuh bala OCPD nyaut telefon sida,” ku iya.

Kelimpah ari nya mega, Acryl madah, taun tu mega dipelaba polis mega deka ngena chara laman web pengawa rama baka Facebook (FB) ngambika mensia mayuh ulih nulis ba FB polis nyangka bisi tasah tauka penusah ke nyadi, polis deka berumbah mutar kes nya.

Atur pengawa nyamu raban pemberita makai di rumah CP nya kemari, keterubah iya dia­tur dalam kandang Acryl megai pengawa nyadi CP menua tu, ke diatur OCPD Kuching, Ro­slan Bek enggau pemesai polis bukai.

Atur pengawa nya kemari ngena berambaika leka jaku ’Bekelala enggau pangan Diri’ endang digaga ungkup pember­ita ngambika ulih bekelala sereta negutka kaul enggau raban polis sereta pemesai polis bukai.

Iya nambah, media nguan pengawa ke berat laban enti nadai pemberita, pengarang berita ku iya, mensia mayuh enda nemu utai ke nyadi ngelingi sida iya.

Ba atur pengawa nya mega, PDRM (Polis Diraja Malaysia) bisi ngangauka ASP (B) Gomez Malong ex-pemesai polis, antara pemesai polis penerima midul tauka gelar SPG enggau Gagah Berani (GB) ke diberi ngagai anak Sarawak ke udah berambun nyawa dataika sida iya dipadu nyadi penerima gelar midul ke pengabis besai dalam dalam pengawa polis menua.

Mayuh ari raban polis bisi ensumbar bujang berani baka tu mayuh udah pinchin lalu mayuh ari sida tu mega enda dikeingat agi kemaya hari tu.

“Tu siti ari atur kelimpah ari sekeda program ke deka diatur jemah ila, kami deka mai sida sereta meri kelala sida iya ngagai rebak ke diatu.

“Aku masuk nyadi polis lebuh menua tu udah likun…Dalam rebak ke diatu, nyangka orang enda ulih berunding baka ni gaya berambun nyawa nya. Beram­bunka nyawa datai ari rebak dulu nyentuk ke diatu, sida ke udah berambun nyawa ngujungka menua tu nyadi baka ke diatu,” ku iya ke ngelalau rebak ke diatu terus ngenang ‘bujang berani’ kelia digaga nyadi chunto.

Sama bisi ngulu atur pengawa nya kemari, Sapit Kepala Polis Menua Dato Law Hong Soon, Kepala Opis Pengatur Polis SAC Datuk Mohd Safian Yassin, semua OCPD menua enggau raban media.