KUCHING: Apai indai ke nadai hari ngambi bantu sekula ke diberi perintah ngagai anak sida tau madah ngagai pengajar kemaya sida nurun ngambi bantu nya.
Sapit Menteri Pelajar Datuk Wee Ka Siong madah, apai indai ke enda ulih ngambi bantu ari sekula patut berunding enggau pengajar anak sida maya ke lantang deka ngambi bantu nya.
Iya madah baka nya laban berita ke madahka bantu ke enda diambi apai indai deka diambi sekula lalu enda diberi ngagai apai indai nembiak.
“Apai indai ke bedau ulih ngambi bantu anak sida iya tekala nya nyangka ketegal gawa, bedau bisi hari ngambi tau berunding enggau sekula maya sida deka ngambi. Sekula enda ‘makai’ bantu nya. Anang ningaka penemu orang.
“Tambah mega nadai kebuah sekula nyimpan bantu ngemayuh nya di sekula. Enda alah ngangauka polis nyaga sekula. Tambah mega bantu nya lebuh diambui apai indai, enda tau enda disain sida..Ukai sengapa ngambi bantu nya,” ku iya.
Bantu Kena Sekula (ungkup Primari 1 ngagai Pom 5) ke sekula Perintah enggau Peribit serata menua tu, dalam penyampau RM500 juta belabuh disadung di serata menua kena 11 Jan tu tadi datai ngagai ujung bulan tu ila.
“Naka ke diatu, pengawa nyadungka bantu nya bejalai enggau manah,” ku iya.