Rumah Jilap nerima bantu ari PKR

0

KAPIT: Chalun ke ulih menang ba Hulu Rajang ti ngarika Parti Keadilan Rakyat (PKR) Abun Sui Anyit udah nyuaka bantu ngagai orang ke tasah ketegal angus ba Rumah Jilap, Tanjung, pelilih Belaga.

Rumah panjai nya angus kena 19 Dis taun siti nyin tadi. Maya ke ngelawa sida nya, raban ari PKR nyuaka bantu baka gari, pekayan sekula, Bup Kudus, radio enggau sekeda kereban ke dipeguna ninting hari.

Bantu nya diterima Tuai Rumah Jilap Usa ngarika peranak dia.

Gari diberi raban gerija ari Gerija SIB Iris Garden di Kuching lalu kereban ke bukai nya diberi orang ke mentas.

Nitihku tuai rumah ke ngarika sida serumah, sida berasai gaga bendar ati nerima bantu ke nulung ngelempungka tating penusah sida. Iya mega ngelaluka bantu ke sebaka ari orang bukai.

Sebedau raban PKR nya mupuk, tuai rumah beterimakasih ngagai raban nya ketegal penyiru sida.

Sekeda raban PKR ke bisi bela datai maya nyuaka bantu nya Langit Bit, Ugah Bengo, Gabriel Atong enggau Engkung Lian.