Monday, August 19

Jelaing: Perintah BN bisi penyiru ke rayat ti dituntung penusah

0

SARATOK: Perintah Barisan Nasional (BN) sekalika nengah ijinsi ke udah dipadu tauka ketuai ari baruh opis nya ngelala penusah ke ditapi rayat.

“Enggau naka ulih, kitai deka ngelempungka pemerat ke nating peranak menua lebih agi maya penusah baka angus.

Sapit Menteri Perengka Pengangkut Jelaing Mersat (gambar) madah munyi nya lebuh nyuaka bantu RM10,000 ari perintah BN ngagai peranak Rumah Chendang Andrew, Sungai Antu, Saratok ke dituntung penusah angus apin lama ke udah, ba Dewan Sekula Primari (SK) Sungai Antu, Saratok ditu kena Hari Enam tu tadi.

“Kami nemu, pekara tu amat ngenyinuka ati sereta berat ba kita, nya alai nengah bantu ti keterubah tu, kami arap ulih ngelempungka mimit pemerat ke tanggung kita.

“Kami enggau naka pengelengkas besemaya meri 20 igi tung ai ke ulih ngundan 400 gilin ai, ngambika bisi dikena kita ditu,” ku iya.

Ku iya baru, sida mega nguji minta perengkaguna bukai ari ijinsi perintah enggau opis menteri, lebih agi bekaul enggau penanggul ke ditapi mensia mayuh ditu.

“Enti nitihka peminta sida ke minta kami muka palan endur nirika rumah panjai baru, kami minta sida empu milih palan nya, berapa penyampau ruang bilik ti enggau ngentakka rumah panjai nya sereta pemesai tanah nya ti deka dikena sida.

“Semua pekara patut ditentuka enggau lengkas ngambika kami nyamai nyediaka belanja dikena bejalai sereta ngenyampatka proses nyediaka tanah rumah nya,” ku iya.

Jelaing ke mega Kaban Parlimen Saratok berasai temegah ati meda sekeda orang ti sama bela nyuaka bantu dikena ngelempungka tanggung sida ti dituntung penusah nya.

Lebuh ke nemuai nya, Jelaing disempulang sekeda pengari ari gerempung ukai dikuasa perintah (NGO), kelab, kompeni dagang orang ti ngatika diri baka ketuai raban bansa engagu orang ke gawa perintah ti sama bela nyuaka bantu baka mata duit enggau sekeda perengka ke bukai.

Beserimbai enggau nya  mega, sida lalu ngumpul duit bantu ba raban sida nya sereta mujur tegumpulka RM14,200. Duit nya tadi lalu disuaka sida ngagai peranak rumah panjai nya.

Bela bisi nyempulang iya, Kaban Kunsil Tinggi Parti Demokratik Progresif Sarawak (SPDP) Chambai Lindong enggau Sekretari Kaban Parlimen Saratok Desmond Reynold Jemeni.