KUCHING: Penerima midul Panglima Gagah Berani (PGB), ASP (B) Wilfred Gomez Malong ,64,(gambar) midang ba Sepital Besai Kuching (HUS) urung pukul 7 pagi kemari ketegal riman tali perut.
Dalam timpuh sebulan, kitai kelebih agi raban bansa Dayak udah ditinggalka dua iku bujang berani ti udah berambunka nyawa ngenan menua ari keruga munsuh komunis sepengudah niang Temenggung Datuk Kanang anak Langkau.
Presiden Sarawak Dayak National Union (SDNU) Tan Sri William Mawan Ikom madah komuniti Iban udah ditingggalka seiku anak Iban ti chukup berani ‘Agi Idup Agi Ngelaban’.
“Komuniti Dayak napi pemidang seiku da agi bujang berani, Wilfred Gomez Malong ti mega nyadika kelai pemerani enggau pengangkun bansa Dayak.
“Taja pia aku perchaya semengat iya deka meransang mayuh agi nembiak rebak baru meretika pengawa sida iya ti udah betachah berambunka nyawa ngelaban munsuh,”ku Mawan.
Niang Gomez ditabanka ngagai HUS urung pukul 12 tengah malam ensanus sepengudah raya napi sakit riman tali perut.
Niang kala nyadi ketuai komander Special Intelligent Unit (Border Scout) di Rejang Area Security Command (Rascom) dalam taun 1970.
Dalam bulan Jun 1973 Gomez nguluka seraban polis ‘Border Scout’ Sarawak ba sebengkah operasi jengking dalam kampung di Ulu Poi Ke alai sida iya udah betachah ngelaban urung 20 iku komunis.
Gomes masuk polis sepengudah iya nembuka Higher School Certificate (HSC) dalam taun 1969.
Niang pinchin dalam taun 1980 sepengudah iya mujur nembuka pelajar Undang-undang (degree) di England.
Niang nerima midul Panglima Gagah Berani (PGB) tikas kedua pengabis tinggi dalam taun 1974 maya umur iya 23 taun.
Niang Gomez deka disengai ba rumah iya di Kampung Entingan, Kota Samarahan.