Sida aruh begunaka Polisi Alternatif ngambika ulih tetangkup ke peminta
TEPA: Moggie (tengah) nyuaka pemeri tanda kenang ‘laja’ ngagai Nazir seraya dikemata Celestine (kiba).
KUCHING: Raban orang dagang bansa Dayak begunaka Polisi Alternatif kelimpah ari New Economic Policy (NEP) ti udah ditumbuhka perintah ngambika tau ngerapitka bida dagang enggau bansa bukai.
Presiden Balai Dagang enggau Industri Dayak (DCCI) Tan Sri Datuk Leo Moggie madah orang dagang bansa Dayak kelebih agi ke datai ari rumah panjai enda ngembuan puku ti mayuh dikena nangkup dagang besai nitihka NEP lalu deka begunaka polisi bukai ti tau mantu.
‘Ari ke didinga aku lebuh ti berandau enggau orang dagang bansa Dayak, tebal agi sida iya madah NEP enda mangat mulaika pemaik ngagai sida iya.
“Dayak dalam pengawa dagang berengkah ari baruh sereta kurang peneleba ba mayuh macham pekara dagang kelimpah ti enda ngembuan puku ti besai.
“Berindik ari nya, orang dagang Dayak begunaka Polisi Alternatif ngambika ulih nangkup sekeda projek pemansang perintah,”ku iya.
Taja pan kitai bansa Dayak agi baru dalam atur dagang, tu ukai nyadika penanggul kitai ngambi bagi dalam projek perintah sereta nyaup pemansang menua ti selaris enggau juluk DCCI, tandu iya.
Moggie mansutka jaku tu ba pengerami DCCI Business Dinner nyerumba 10 taun penumbuh balai nya ke diatur di Hotel Grand Magherita ditu, malam ensanus.
Iya ngansak raban orang dagang Dayak nyikap diri enggau bemacham penau dagang sereta belajar ari orang ke udah mujur ngambika ulih besemekih dalam makit dagang ti majak ngerembai maya ke diatu.
Speaker ke diundang ba pengawa makai lemai nya, Group Chief Executive CIMB Dato Sri Nazir Razak madahka orang dagang bansa Dayak patut beambi ulih ari pemayuh macham bansa enggau main asal ti bisi di Sarawak enggau Malaysia.
Ku iya, pengelebih nya deka ngadaka kaul dagang ti besai lalu tau mai pemaik ngagai semua.
Ba pengerami nya DCCI meri bantu ngagai dua bengkah genturung pendiau Iban , Kampung Kudei (Iban) nerima RM5,000 enggau Kampung Siol Kandis RM5,000.
Bela datai Sapit Kepala Menteri Datuk Patinggi Tan Sri Dr. Afred Jabu, Sapit Presiden DCCI ke mega nyadi chairman pengatur pengawa Dato Sri Celestine Ujang, Menteri Pemansang Tanah Tan Sri James Masing sereta raban menteri bukai.