KUCHING: Sarawak Energy Bhd (SESCO) maya bejalaika pengawa meresa ulah ngubah meter karan mujur tetemuka meter karan ke diubah ba sebengkah genturung pendiau perisi penatai pemisi di Jalai Lutong enggau Jalai Pujut, Miri.
Seraban orang ari SESCO ke meresa genturung pendiau ba Jalai Pujut tetemuka pengawa masang wayar meter karan disambung terus ngambika ulih ngurangka penyampau bil elekterik.
Bisi sekeda penguna nerima bil genap bulan kurang ari RM80 ke enda patut di chaj nyampau nya, laban beratika rumah endur diau nya besai nyengkaum pemayuh tubuh ke diau dalam rumah nya.
Urung 28 persin ari semua meter ke di peresa ditemu udah di ubah lalu ngayan ke pemayuh ubah ke digaga ba sitak genturung pendiau nya pengabis mayuh di Miri enti dibanding enggau sitak bukai.
Nitih penerang ari SESCO ba surat tu, rumah suwa ke diperesa nya baru tembu lalu dipelaba masang wayar terus baka nya nyangka digaga lebuh orang ke dulu agi kala nyuwa dia udah pindah ngagai rumah baru sida iya.
Pengari SESCO nya madahka ngubah meter enggau chara masang kediri kelebih agi nyambung terus nya pengawa ke enda likun.
Iya madah raban SESCO ke meresa genturung pendiau ba Jalai Pujut nya mega betapi enggau mayuh macham penanggul deka tama ngagai rumah ke deka diperesa nya laban pagar ke bekunchi lalu nyau muai jam baru pulai ngagai endur nya baru.
“Bisi rumah ke dikunchi maya siang hari laban orang ke diau dalam rumah nya udah nurun gawa, nya alai raban SESCO nyau muai jam baru pulai ngagai rumah nya baru lemai hari tauka ujung minggu maya bisi orang di rumah,” ku iya.
Iya nambah meresa meter karan enggau orang ke ngempu rumah nya manah agi ngambika sida iya empu meda chara meter ke diubah sida iya empu nya enda likun.
Juruteknik SESCO mega deka nerang ngagai orang ke ngempu rumah nya enti bisi ditemu meter nya patut diganti tauka enda.
Ari Baruh Genteran Tusun Ukum Seksyen 32 (b) Ordinan Tenaga Elektrik SESCO tau minta waran tama ke dalam rumah ari Majistret ngambika ulih meresa meter rumah nya.
SESCO udah minta sekeda waran tama ke dalam rumah ke dikunchi orang ke ngempu rumah nya ke enggai meri kerejasama sida iya enti maya bejalaika atur meresa meter.
SESCO minta kerejasama ari mensia mayuh dalam pengawa sida iya deka mersa meter.
Lalu pia mega, mensia mayuh tau minta pas pengelala raban SESCO sebedau sida iya ngemendarka juruteknik SESCO tama ke dalam rumah.
Mensia mayuh mega ulih ngaga kompelin enti sema sida iya nemu bisi pengawa bechurika karan nyadi ba endur sida, enggau chara betelefon ngagai lumur 082-443535.
Pengawa enchuri karan siti pengawa ke salah lalu tau kena ukum nengah Genteran Tusun Ukum Baruh Seksyen 33 (5) Ordinan Tenaga Elektrik ke tau diukum manggai RM100,000 tauka kena jil lima taun tauka kededua nya sekali.