KELAI PENYADI: Paul mangkung tawak kelai bejadika SDNU Pampang Samarahan malam ensanus.
KUCHING: Semua kaban Gerempung Bansa Dayak Sarawak (SDNU) ditangkan ngambika enda ngaul diri dalam pekara politik sereta diperansang ngenegapka tuju asal gerempung ti deka nyerakup bansa Dayak.
Presiden SDNU Tan Sri William Mawan Ikom madah tuju asal SDNU ditumbuh ba taun 1955 suba iya nya dikena nyerakupka bansa Dayak lebih agi Iban ngambika tau begempung mai pemujur.
“SDNU dikelai nyadi sebuah gerempung ukai dikuasa perintah (NGO) ti pemadu tuai dalam Sarawak lalu majak diterima sereta dipebasa raban ketuai.
“SDNU angkun mutarka penanggul ke ditapi bansa Dayak kelebih agi ba pekara pelajar, main asal, lumba sereta penusah rama,” ku Mawan ba pengerami Beserumpu Makai Lemai nyerumba Pengawa Ngepunka SDNU Pampang Samarahan malam ensanus.
Jaku iya dibacha Mandal Presiden Anthony Banyan ti ngarika iya.
Mawan ke mega Menteri Pemansang Rama madah dalam atur pengawa ngemansangka bansa Dayak baikka nya di mengeri tauka di menua pesisir, pekara politik sigi ditagang dibai dalam SDNU.
Berindik ari nya, iya meransang mayuh agi bansa Dayak masuk pampang SDNU ke besemak enggau sida iya diau lalu bekenaka gerempung nya mutarka sebarang penanggul ke bisi kelimpah ari ngemansangka bansa.
Ku iya, dalam taun 2013 tu iya nya dalam timpuh dua bulan ke udah, 3 pampang SDNU sereta sebuah pampang Serakup Indu Dayak Sarawak (SIDS) udah mujur direjister nengah Opis Pengerejister Gerempung (ROS).
Ketetiga pampang SDNU ke baru iya nya, pampang Kapit, Song Samarahan sereta SIDS Samarahan.
Naka ke diatu ngelui 20,000 iku bansa Dayak udah ngerejister diri dalam SDNU serata Sarawak.
Ba pengerami nya, Sekretari Politik Kepala Menteri Paul Igai ti ngarika Mawan (Opis Menteri Pemansang Rama ,KPSU) ngansak SDNU majakka pengawa ngemansangka bansa Dayak ti dipeda iya udah mujur dipejalai.
Ku iya, ngelui 500 buah gerempung dikuasa KPSU naka ke diatu nyengkaum SDNU ke alai iya pechaya program ubah ti dibai Mawan dalam SDNU ulih bendar mansutka asil ti besai agi.
Paul mega ngenataika pemeri geran ari Mawan sepenyampau RM10,000 ngagai SDNU Samarahan ti baru direjister nengah ROS kenaka 21 November 2011 tu tadi.
Bela bisi ngulu atur pengawa nya Sekretari Politik Kepala Menteri Maurice Joannes Giri,chairman SDNU pampang Samarahan Belayong anak Pok sereta kaban gerempung bukai.