Tuesday, November 19

JKKK patut ngemeratka pelajar anak, ku Masir

0

SRI AMAN: Kaban Parlimen Sri Aman Masir Kujat minta semua Komiti Pemansang Enggau Pengelikun Genturung Pendiau (JKKK) seruran beratka pelajar nembiak ba genturung pendiau sida.

Ku iya, endang tanggungpengawa JKKK nerangka ngagai bala raban sida senentang pemesai reti meri pelajar ke chukup ngagai anak kelimpah ari ti ngemeratka pekara pemansang ke bukai.

“Lebuh kitai nyikap diri manggai ba taun 2020, bala anak kita patut disikap ngena mayuh macham pemandai ke chukup ngambika sida enda tinggal ari arus pelajar menua.

“JKKK ba ninting genturung pendiau tauka ba rumah panjai patut bejalaika tanggungpengawa sida dalam pekara tu laban bala anak nya ke nyadi reta ke pemadu berega ngagai menua sereta dikearapka nyadi ketuai menua jemah ila,” ku iya lebuh ti bejaku ba Pengerami Bejadika JKKK enggau Biro Indu Rumah Mail, Kubau Dor, Melugu Skim, ditu.

Ku iya baru, menua amat begunaka raban orang ke pandai ngemansangka menua tu dudi ila. Nyerumba taun 2020, genap buah ruang bilik dikearapka pemadu nadai negmbuan seiku orang ke graduate.

“Enti sema kita enda nganjung anak kita besekula, kati gaya pengidup sida dudi ila.

“Tentu sida tinggal ari ngasaika pemansang menua,” ku iya.

Bela bisi ngulu pengerami nya,Menteri Muda Betanam Betupi Moden ke mega Menteri Muda Dagang Temuai sereta mega Kaban Kunsil Nengeri (ADUN) Bukit Begunan Datuk Mong Dagang,bala ketuai opis perintah enggau bala ketuai raban bansa ban kandang menua nya.

Berebak enggau pengerami nya, Masir ngungkupka belanja  RM3,000 ngagai JKKK lalu RM2,000 agi ungkup Biro.Mong mega ngungkupka RM5,000 ngagai JKKK lalu RM3,000 ngagai Biro Indu.