KUCHING: Kolej Komuniti Kuching deka berengkah nerima raban orang nyelai pendiau (OKU) belajar ba palan nya berengkah bulan Julai taun tu nengah Program Sijil Kemahiran Khas Kolej Komuniti (PSKKKK).
Kepala Direktor Opis Pelajar Tinggi Kolej Komuniti (JPKK) Amir Md Noor (gambar) madah, atur nya entara pengawa Opis Menteri Pelajar Tinggi ti deka ngangkatka Kolej Komuniti menua.
Ku iya, dikena ngepunka program nya, pelajar OKU ari tujuh buah sekula sekondari dalam kandang Kuching udah dipilih deka dilatih di Kolej Komuniti Kuching ke alai opis pelajar tinggi nagit teulihka sepenyampau 1,111 iku sida nya taun tu.
”JPKK ditesau ngangkatka Kolej Komuniti Menua sereta matih raban OKU ngambika ngembuan pengelandik tikas setipikit ti diterima Agensi Kelayakan Malaysia (MQA).
“Atur tu ditetap pengudah pansik mandangka menua kitai rugi RM9.3 biliun setaun ketegal pengelandik ti dikembuan raban tu enda diguna,” ku iya ba aum pengarang berita kemari.
Ku Amir pelajar OKU ti belajar di Kolej Komuniti deka dilatih nengah Program Kemahiran Khas Kolej Komuniti, kerejasama enggau Lembaga Pembangunan Koridor Wilayah (RECODA) sereta industri di palan SCORE.
Di Sarawak, iya madah raban OKU deka dilatih dalam Program Sijil Kolej Komuniti Asas Jahitan Kreatif ke dikumbai Program Sijil Kemahiran Khas Fesyen Dan Pakaian dulu agi ari tu.
“Juluk kitai deka nyikap raban OKU enggau pengelandik lalu ngarapka sida iya ulih nyadi orang dagang pekayan sereta nyadi pengaji,” ku iya.
Ngenang senentang PSKKKK iya madah enam buah agi kolej komuniti udah dipilih bejalaika program iya nya Kolej Komuniti Jelebu, Kolej Komuniti Paya Besar, Kolej Komuniti Sungai Siput, Kolej Komuniti Bayan Baru enggau Kolej Komuniti Selayang.
Nitihka statistik ari Opis Pengintu Pengelantang Pendiau ungkup taun 2011 sepenyampau 134, 659 iku OKU napi penanggul belajar lalu nya nyengkaum semua renggat umur.
Nitihka penerang berita ti diberika ngagai media, atur ke patut dititih dikena masuk diungkupka ngagai OKU iya nya beumur 17-19 taun (enda kala ngambi peresa SPM), tembu sekula sekondari sereta tembu sekula Khas sereta udah direjister enggau Opis Pengintu Pengelantang Pendiau.
Sida iya deka nempuh timpuh belajar sepengelama 20 bulan (empat semester sereta sebulan latih industri) sereta ngembuan awak nampung pelajar ngagai renggat tinggi.