Tuesday, November 19

Liang Mikui dipilih ngiring PIBG SMKLB No.1

0

SIBU: Sekolah Menengah Kebangsaan (SMK) Luar Bandar No. 1 Sibu mujur ngatur Aum Besai Milih Komiti Serakup Apai Indai enggau Pengajar (PIBG) sekula nya, empai lama tu tadi.

Ba pengawa ke digulu urung 600 iku bala apai indai nya, Liang Mikui dichiri nganti Dali Merawing megai pengawa chairman PIBG sekula nya kelimpah beberapa iti penuduk ke bukai bela diganti.

Kepala pengajar sekula nya, Tan Hock Sang ngambi awak beterima kasih ngagai bala apai indai ketegal enda kala leju meri sukung ngagai sekula ba tuju nyaup pemansang pelajar nembiak.

“Ketegal sukung kita bala apai indai, sekula kitai mujur bulih pemutus peresa ti manah dalam kandang lima taun bejurut tu,” pia ku iya madah.

Ku Tan, iya mega temegah ati laban bala apai indai sekula nya lempung tulang ngulu pengawa beripai ke diatur sekula.

“Kitai ngarapka sukung baka tu belama ngambika nama-nama progrem bekaul enggau sekula ulih diatur kitai enggau lantang.

“Tu mega tau meri peransang ngagai bala pengajar ransing agi ngajar nembiak ngulihka pemujur,” pia ku iya madahka baru.

Bekenangka pengawa sehari nya, ku Tan, iya ngarapka nengah PIBG bala komiti ulih beserakup enggau pangan diri.

Kelimpah ari nya, iya mega madahka PIBG nyadika batang pelasar pemujur sesebengkah sekula.