SIBU: Raban orang dagang ke bejualka ikan di Makit Sental Sibu ditu ditangkan ngambika enda irau senentang palan alai sida bejual pengudah pengawa ngemanahka makit nya tembu dalam kandang tiga bulan tu ila.
Pekara tu dibantai Menteri Wang II Dato Sri Wong Soon Koh maya nemuai ngagai palan projek nya, kemari.
Ku iya, taja pan baka nya, bala ke bejual dia aruh besabar nganti projek nya tembu ila.
“Aku nemu pekara tu ngujungka mayuh penanggul ke bukai nyadi. Tang kitai nadai chara bukai dikena nyeliahka penanggul nya kelimpah meri awak ngagai projek nya dipejalaika enggau lanchar,” pia ku iya madah.
Bela nyempulang penemuai Wong iya nya Chairaman Opis Kunsil Sibu (SMC) Datuk Tiong Thai King, Sapit Chairman SMC Daniel Ngeing enggau Chairman Komiti Pengawa Daja Mit Opis Kunsil Sibu (SMC) Kaunsilor Chieng Buong Toon.
Maya nya mega, ku Chieng, projek nya bekenaka ungkus RM1 milliun nyengkaum ngaga dua iti agu.
Ungkus nya ku iya, dibantai Menteri Besai Datuk Seri Najib Tun Razak maya nemuai ngagai Makit Sentral nya taun siti nyin tadi.
Chieng madah, pengawa nya belabuh ari 1 Mac lalu diperambu deka tembu bulan Jun tu.
Naka ke diatu bisi 143 mija alai bejual dipindah ngagai palan bukai dulu nganti penembu projek nya.
Wong ti mega Menteri Kunsil Kandang Menua enggau Pemansang Raban Bansa ngarapka kontraktor nyempilka agi timpuh projek nya.